បរទេស៖ ក្រុមបិសាចក្រហម Manchester United បានរងបរាជ័យដ៏មិននឹកស្មានដល់ក្នុងលទ្ធផល ២-១ នៅលើទឹកដីក្រុម Young Boys បើទោះបីខ្សែប្រយុទ្ធ Cristiano Ronaldo បានរកគ្រាប់បាល់បើកឆាកក្នុងការប្រកួតក្របខ័ណ្ឌ Champions League កាលពីថ្ងៃអង្គារក៏ដោយ ស្របពេលដែល Chelsea បានចាប់ផ្តើមការពារពានរបស់ខ្លួនតាមរយៈការផ្តួលក្រុម Zenit។
ជាមួយគ្នានេះ ខ្សែប្រយុទ្ធ Robert Lewandowski បានស៊ុតបាល់បញ្ចូលទី២គ្រាប់ឲ្យក្រុម Bayern Munich ខណៈដែលក្រុមយក្សអាល្លឺម៉ង់មួយនេះ បានកត់ត្រាជ័យជម្នះក្នុងលទ្ធផល ៣-០ លើក្រុម Barcelona នាកីឡដ្ឋាន Camp Nou ក្នុងការប្រកួតក្របខ័ណ្ឌអឺរ៉ុបជាលើកដំបូងរបស់ពួកគេ បើគិតចាប់តាំងពីការចាកចេញរបស់ Lionel Messi។ Ronaldo ដែលជាអ្នករកបានគ្រាប់បាល់នាំមុខគេក្នុងប្រវត្តិសាស្ត្រនៃក្របខ័ណ្ឌ Champions League បានរកគ្រាប់បាល់ទី១៣៥របស់គេ ក្នុងយុទ្ធនាការនេះ ក្រោយពីលេងបាន១៣នាទី នៅទីក្រុង Bern ប៉ុន្តែ ក្រុមម្ចាស់ជើងឯករបស់ស្វ៊ីស Young Boys បានវាយបកវិញ ក្រោយពីការពិន័យកាតក្រហមលើខ្សែការពារ Aaron Wan-Bissaka។ ខ្សែការពាររបស់ Man United រូបនេះ បានរងពិន័យកាតក្រហម ដោយសារតែការប្រជែងដណ្តើមបាល់ដ៏គ្រោះថ្នាក់ពី Christopher Martins នៅមុនពេលបញ្ចប់តង់ទី១។
ដោយឡែក លោក Thomas Tuchel គ្រូបង្វឹករបស់ Chelsea បាននិយាយថា ការរកបានគ្រាប់បាល់កាត់សេចក្តីរបស់ Romelu Lukaku ក្នុងពេលយកឈ្នះលើ Zenit ១-០ គឺជាចំណុចដែលក្រុមតោខៀវខ្វះខាត បើទោះបីឈ្នះពាន Champions League កាលពីរដូវកាលមុនក៏ដោយ។ លោក Tuchel បានឲ្យដឹងថា៖ «រូបគេជាប្រភេទកីឡាករដែលយើងមិនមាន។ រូបគេជាកីឡាករសំខាន់ណាស់»៕
ប្រភពព័ត៌មាន៖ Channel News Asia
