បរទេស៖ លោក Jurgen Klopp បាននិយាយថា ក្រុម Liverpool របស់លោក «ត្រូវជួបពូលដ៏ខ្លាំងបំផុត» ក្នុងក្របខ័ណ្ឌ Champions League បើគិតចាប់តាំងពីលោកបានចូលរួមជាមួយនឹងក្លិបនេះ និងបាននិយាយការពាររូបមន្តនាពេលបច្ចុប្បន្នរបស់យុទ្ធនាការនេះ ខណៈដែលលោកត្រៀមរៀបចំក្រុមរបស់លោកសម្រាប់ការប្រកួតជាមួយនឹង AC Milan នៅរាត្រីនេះ។
ក្រុម Liverpool របស់លោក Klopp នឹងត្រូវប៉ះជាមួយនឹងក្រុមម្ចាស់ជើងឯកទ្វីបអឺរ៉ុប៧សម័យកាល AC Milan ក្រុមម្ចាស់ជើងឯកអេស្ប៉ាញ Atletico Madrid និងក្រុម Porto ដែលជាម្ចាស់ជើងឯកក្របខ័ណ្ឌ Champions League ឆ្នាំ២០០៤ ក្នុងការប្រកួតពូល B។ សហព័ន្ធកីឡាបាល់ទាត់ប្រចាំទ្វីបអឺរ៉ុបហៅកាត់ថា UEFA កាលពីដើមឆ្នាំនេះ បានប្រកាសពីរូបមន្តថ្មីសម្រាប់ក្រខ័ណ្ឌ Champions League ចាប់តាំងពីឆ្នាំ២០២៤តទៅ តាមរយៈការប្តូរការប្រកួតវគ្គចែកពូលដែលមាន៣២ក្រុម ជាមួយនឹងក្របខ័ណ្ឌលីកដែលមានក្លិបចំនួន៣៦។ រូបមន្តថ្មីនេះ បាននាំឲ្យមានការព្រួយបារម្ភថា គុណភាពនៃយុទ្ធនាការនេះ នឹងត្រូវកាត់បន្ថយ ស្របពេលដែលអ្នកចាត់ការទូទៅជាច្រើន ក៏និយាយពីទទួលបន្ទុកលេងការប្រកួតច្រើនពេកសម្រាប់កីឡាករផងដែរ។
លោក Klopp បានប្រាប់សន្និសីទសារព័ត៌មានកាលពីថ្ងៃអង្គារថា ក្រុមក្នុងពូលរបស់ Liverpool នៅរដូវកាលនេះ បានបង្ហាញពីភាពខ្លាំងនៃរូបមន្តនាពេលបច្ចុប្បន្ន។ គ្រូបង្វឹកសញ្ជាតិអាល្លឺម៉ង់រូបនេះ ដែលក្រុមរបស់លោកបានលើកពាន Champions League ក្នុងឆ្នាំ២០១៩ បានឲ្យដឹងថា៖ «ពិតណាស់ នេះគឺជាពូលដ៏ខ្លាំងបំផុត បើគិតចាប់តាំងពីខ្ញុំនៅជាមួយ Liverpool»៕
ប្រភពព័ត៌មាន៖ Channel News Asia