បរទេស៖ ទីបំផុត ខ្សែប្រយុទ្ធ Lionel Messi បានចូលលេងក្នុងជម្រើសទាំង១១នាក់ដំបូងជាលើកទី១សម្រាប់ Paris Saint-Germain កាលពីថ្ងៃពុធ ប៉ុន្តែ ក្រុមយក្សរបស់បារាំងមួយនេះ បានបញ្ចប់ក្នុងលទ្ធផលស្មើ ១-១ ជាមួយនឹងក្រុម Club Brugge នៅបែលហ្ស៊ិក ក្នុងថ្ងៃប្រកួតបើកឆាករបស់ពួកគេក្នុងយុទ្ធនាការ Champions League។
កីឡាករ Ander Herrera បានជួយឲ្យ PSG រកបានគ្រាប់បាល់នាំមុខមុន នាកីឡដ្ឋាន Jan Breydel នៅមុនពេល Hans Vanaken បានរកគ្រាប់បាល់តាមស្មើវិញឲ្យក្រុមម្ចាស់ផ្ទះ ដែលបានបង្ហាញពីទម្រង់លេងយ៉ាងល្អ និងដណ្តើមបាន១ពិន្ទុយ៉ាងសក្តិសម។ Messi ដែលបានលេងត្រឹមតែ២៤នាទីក្នុងនាមជាកីឡាករបម្រុងនៅមុនពេលការប្រកួតនេះ នៅតែត្រូវស្វែងរកគ្រាប់បាល់ជាលើកទី១សម្រាប់ក្លិបថ្មីរបស់គេ បើទោះបីរូបគេបានស៊ុតបាល់ប៉ះនឹងរបារទីក្នុងតង់ទី១ និងបានដាក់សម្ពាធលើអ្នកចាំទី Simon Mignolet របស់ក្លិប Brugge នៅតង់ទី២ នៅមុនពេលរងពិន័យកាតលឿងសម្រាប់ការប្រព្រឹត្តកំហុសលើ Mats Rits ក៏ដោយ។
ប៉ុន្តែ ទោះបីជាយ់ាងណា នេះមិនមែនជាការបង្ហាញពីទម្រង់លេងដ៏រឹងមាំរបស់ក្រុម PSG ខណៈដែលលោកគ្រូបង្វឹក Mauricio Pochettino បានដាក់តារាឆ្នើមទាំង៣របស់លោកគឺ Messi, Neymar និង Kylian Mbappe ឲ្យលេងជាមួយគ្នាជាលើកដំបូង៕
ប្រភពព័ត៌មាន៖ Channel News Asia
