បរទេស៖ ការចាប់អារម្មណ៍ផ្សេងៗ នឹងធ្លាក់ទៅលើ Cristiano Ronaldo ម្តងទៀត ខណៈដែលក្រុមបិសាចក្រហម Manchester United សម្លឹងរកការស្តារមុខមាត់ត្រឡប់មកវិញចំពោះការរងបរាជ័យដ៏គួរឲ្យភ្ញាក់ផ្អើលក្នុងក្របខ័ណ្ឌ Champions League ក្រោមស្នាដៃក្រុម Young Boys នៅពេលដែលកំពុងនាំមុខលើតារាងក្របខ័ណ្ឌ Premier League មួយនេះ ធ្វើដំណើរទៅកាន់ទឹកដីក្រុម West Ham នៅថ្ងៃអាទិត្យ។
ជាមួយគ្នានេះ ក្រុមឈរលេខ២ Chelsea កំពុងតែដេញតាមពីក្រោយ Man United ដោយសារតែមានគ្រាប់បាល់តិចជាង និងសម្លឹងរកការបន្តការមិនស្គាល់ចាញ់សោះរបស់ពួកគេនៅរដូវកាលនេះក្នុងការប្រកួតរវាងក្រុមស្ថិតក្នុងទីក្រុងឡុងដ៍ដូចគ្នា លើទឹកដីក្រុម Tottenham។ លោក Ole Gunnar Solskjaer បានទាមទារឲ្យ Man United ធ្វើការឆ្លើយតបភ្លាមៗ ក្រោយពីសុទិដ្ឋិនិយមរបស់លោក ក្រោមជំនួយពី Ronaldo បានជួបភាពរង្គោះរង្គើរ នៅទីក្រុង Bern។ ក្រុមរបស់លោក Solskjaer បានទទួលជ័យជម្នះ៣លើក ក្នុងចំណោមការប្រកួត៤លើកដំបូងរបស់លោកក្នុងក្របខ័ណ្ឌ Premier League នៅរដូវកាលនេះ ក្នុងនោះរាប់បញ្ចូលទាំងជ័យជម្នះលើក្រុម Newcastle ក្រោមជំនួយដ៏ធំពី Ronaldo ក្នុងការប្រកួតនៅកីឡដ្ឋាន Old Trafford កាលពីចុងសប្តាហ៍មុនផងដែរ។
Ronaldo បានស៊ុតបាល់បញ្ចូលទីម្តងទៀត ក្នុងទីក្រុង Bern ប៉ុន្តែ Man United បានលិចលុងវិញ ក្រោយពីការរងពិន័យកាតក្រហមរបស់ Aaron Wan-Bissaka ក្នុងការប្រកួតបើកឆាកនៃវគ្គចែកពូលក្នុងក្របខ័ណ្ឌ Champions League របស់ពួកគេ។ លោក Solskjaer បានឲ្យដឹងថា៖ «ទម្រង់លេងរបស់យើងគឺដូចដែលអ្នករំពឹងទុកអ៊ីចឹង គឺការផ្តោតអារម្មណ៍ ទោះបីជាខកចិត្តបន្តិច ប៉ុន្តែ មិនបាក់ទឹកចិត្តឡើយ។ យើងត្រូវតែស្តារមុខមាត់វិញ»៕
ប្រភពព័ត៌មាន៖ Channel News Asia