ក្រុមភ្នំពេញក្រោន មិនអាចរក្សាកំណត់ត្រាដ៏ល្អរបស់ខ្លួន បានទៀតនោះទេ បន្ទាប់ពីពួកគេ បានចាញ់ក្រុមម្ចាស់ផ្ទះ ព្រះខ័នរាជស្វាយរៀង ១-០ ដែលនេះជាការបរាជ័យលើកដំបូងរបស់ពួកគេ គឺដូចគ្នាទៅនឹងក្រុម វិសាខា ផងដែរ ដែលមិនអាចរក្សាកំណត់ត្រា មិនធ្លាប់ចាញ់សោះ របស់ពួកគេបាន ក្រោយចាញ់ ក្រុមបឹងកេត ២-១ កាលពីថ្ងៃសៅរ៍ ជាមួយគ្នានោះ។
តាមរយៈការប្រកួត នៅកីឡដ្ឋានខេត្តស្វាយរៀង កាលពីថ្ងៃសៅរ៍នោះ ក្រុមភ្នំពេញក្រោន បង្កើតឱកាសបានច្រើនជាងក្រុមម្ចាស់ផ្ទះ ព្រះខ័នរាជស្វាយរៀង ប៉ុន្តែពួកគេ មិនអាចរកបានសូម្បី១គ្រាប់។ ផ្ទុយពីនេះ ការរកបាន១គ្រាប់ របស់ប្រយុទ្ធចំណូលថ្មីជនជាតិកាមេរូន Emmanuel នៅនាទីទី៨៥ បានក្លាយជាជ័យជម្នះយ៉ាងធំធេង និងរំភើបខ្លាំងបំផុត សម្រាប់ក្រុមស្វាយរៀង។
យ៉ាងណាក៏ដោយ ប្រធានក្លិបភ្នំពេញក្រោន លោកឧកញ៉ា ឬទ្ធី សំណាង មិនបានបង្ហាញការអាកអន់ចិត្ត ឬខកចិត្ត ចំពោះការបរាជ័យ ជាលើកដំបូងរបស់ ក្រុមសិង្ហក្រហម នៅរដូវកាលនេះទេ។ ផ្ទុយទៅវិញលោកបានសម្តែងការអបអរ ទៅដល់ក្រុមទាំងមូល ដែលបានខិតខំប្រឹងលេងអស់ពីចិត្ត សម្រាប់ការប្រកួតដ៏ធំនេះ។ លោកបានផ្ញើសារលើកទឹកចិត្ត ដល់ក្រុមរបស់លោក បែបនេះថា៖ «ប្រសិនបើអ្នកព្យាយាមហើយនៅតែបរាជ័យ សូមអបអរសាទរ ដោយសារតែមនុស្សភាគច្រើនសូម្បីតែសាកល្បង ក៏មិនបានសាកល្បងផង»។
តែទោះបីជាយ៉ាងណា ចំពោះលោក Oleg ដែលគ្រូបង្គោលក្រុមភ្នំពេញក្រោន ហាក់មិនអាចចិត្តជាមួយលទ្ធផលនេះទេ ហើយលោកបានអះអាងថា ក្រុមរបស់លោក ចាញ់តែលទ្ធផលប៉ុណ្ណោះ។ «យើងមិនរៀបចំ ដើម្បីចាញ់នោះទេ ក្នុងនាមជាក្លិប និងជាក្រុមទាំងមូល យើងធ្វើអ្វីគ្រប់យ៉ាង គឺដើម្បីជ័យជម្នះ។ យើងចាញ់ការប្រកួតនេះដោយសារតែលទ្ធផល ប៉ុន្តែការលេងគឺមិនចាញ់នោះទេ យើងមានឳកាសជាច្រើនក្នុងការប្រកួតនីមួយៗ»។
ជាមួយគ្នានេះ គ្រូបង្វឹកជនជាតិអ៊ុយក្រែន លោក Oleg បាននឹងកំពុងជំរុញកូនក្រុមរបស់លោក ឱ្យក្រោកឈរឡើង និងខំប្រឹងប្រយុទ្ធទៅមុខ ជាបន្តទៀត ដើម្បីប្រជែងយកពានរង្វាន់ នៅរដូវកាលនេះ ព្រោះការចាញ់ក្រុមស្វាយរៀង វានៅមិនទាន់ធ្វើឱ្យ ភ្នំពេញក្រោន ធ្លាក់ភាគរយ ក្នុងការប្រជែងយកពាន នៅឡើយទេ ដ្បិតអី ភ្នំពេញក្រោន នៅតែមាន២៨ពិន្ទុ ស្មើជាមួយក្រុមឈរនៅកំពូលតារាងទាំង៤ ដដែល។
លោក Oleg បានបញ្ជាក់ថា៖ «អ្វីដែលត្រូវការបន្តទៀតនោះ គឺយើងត្រូវតែធ្វើការឱ្យមានគុណភាព គ្រប់សកម្មភាពរបស់យើងទាំងអស់ មិនថា ទាំងការគ្រប់គ្រងបាល់ និងការការពារ។ យើងត្រូវតែក្រោកឈរឡើង បន្ទាប់ពីការចាញ់នេះ ហើយបន្តប្រយុទ្ធទៀត ដើម្បីពានរង្វាន់ យើងទទួលយកនៅសម្ពាធ ហើយយកវាមកធ្វើជាកម្លាំងចិត្ត ដើម្បីការឈ្នះនៅពេលអនាគត»៕
