កីឡាករបរទេសចំនួន៥នាក់ ដែលទើបបានបង្ហាញខ្លួនឱ្យក្រុមថ្មីចំនួន៤ សម្រាប់ការប្រកួតជើងទី២ នៃលីគកំពូលកម្ពុជា ឆ្នាំ២០២១ សុទ្ធតែរកបានគ្រាប់បាល់ ដើម្បីផ្តល់ភាពរីករាយឱ្យក្រុមថ្មីរបស់ពួកគេ ចំណែកខ្សែប្រយុទ្ធដ៏ឆ្នើមរបស់ណាហ្គាវើលដ៍ Marcio រកបាន២គ្រាប់បន្ថែមទៀត ដើម្បីឡើងទៅឈរនៅលេខ១ ក្នុងនាមជាកីឡាករ ដែលរកបានគ្រាប់បាល់ច្រើនជាងគេ ជាបណ្តោះអាសន្ន។
តាមរយៈការប្រកួត ប្រជែងរវាងក្រុមកំពូលតារាងទាំង៨ (Top8) កាលពីថ្ងៃសៅរ៍ និងថ្ងៃអាទិត្យ ម្សិលមិញ ខ្សែប្រយុទ្ធជនជាតិកាមេរូន Emmanuel Mbarga បានធ្វើឱ្យការបង្ហាញខ្លួន ជាលើកដំបូងឱ្យក្រុមព្រះខ័នរាជស្វាយរៀង កាលពីថ្ងៃសៅរ៍ បានបញ្ចប់ដោយភាពជោគជ័យ ព្រោះការរកបាន១គ្រាប់របស់គេ នៅនាទីទី៨៥ ក្រោយការបញ្ចូនបាល់ពីបងប្រុសបង្កើតរបស់គេគឺ Privat Mbarga បានជួយឱ្យក្រុមស្វាយរៀង យកឈ្នះក្រុមខ្លាំង ភ្នំពេញក្រោន ១-០ ដ៏មានន័យបំផុត ដើម្បីឡើងទៅឈរនៅកំពូលតារាង ជាបណ្តោះអាសន្ន។
ស្រដៀងគ្នានេះ ខ្សែប្រយុទ្ធធ្លាប់លេងឱ្យច្រើនក្លិបនៅកម្ពុជា Timothy Okereke ក៏រកបាន១គ្រាប់ សម្រាប់ការបង្ហាញខ្លួនជាលើកដំបូង ឱ្យក្រុមកងយោធពលខេមរភូមិន្ទ (ទ័ព) ផងដែរ ហើយគ្រាប់បាល់ ដែលកើតមានឡើង នៅនាទីទី៦០នេះ បានក្លាយជាការរួមចំណែក ក្នុងការជួយឱ្យក្រុមទ័ព យកឈ្នះក្រុមគិរីវង់សុខសែនជ័យ ៣-១ កាលពីថ្ងៃអាទិត្យ។
ចំណែកខ្សែប្រយុទ្ធចំណូលថ្មីមកពីប្រេស៊ីល Christian Alex ក៏រកបាន១គ្រាប់ សម្រាប់ការបង្ហាញខ្លួនជាលើកដំបូង ឱ្យក្រុមវិសាខា កាលពីថ្ងៃសៅរ៍ផងដែរ ប៉ុន្តែគ្រាប់បាល់ ដែលបានកើតមានឡើង នៅនាទីទី៥៨ នេះ មិនបានជួយឱ្យ វិសាខា ឈ្នះការប្រកួតនោះទេ គឺពួកគេបានចាញ់ក្រុមបឹកកេត ២-១ ដែលសុទ្ធបញ្ចូលទីដោយខ្សែប្រយុទ្ធឆ្នើម ចាន់ វឌ្ឍនាកា នៅនាទីទី២៥ និងទី៣០។
ចំណែកខ្សែប្រយុទ្ធ Paul Esoh Omogba និង Jose Dourado Magson សុទ្ធតែរកបានម្នាក់១គ្រាប់ សម្រាប់ការលេងឱ្យក្រុមខេត្តព្រៃវែង ជាលើកដំបូង ដើម្បីយកឈ្នះក្រុមអាស៊ីអឺរ៉ុប ៤-១ ក្នុងការប្រកួតរវាងក្រុមចំណាត់ថ្នាក់ទាំង៥ក្រោម( 5 Bottom Team) ហើយការឈ្នះបាន៣ពិន្ទុនេះ បានជួយឱ្យ ខេត្តព្រៃវែង កាន់តែមានភាគរយខ្ពស់ ក្នុងការគេចផុតពីការកាត់ចោល ឬធ្លាក់ទៅលេងនៅលីគទី២ នៅឆ្នាំ២០២២វិញ ព្រោះពេលនេះ ពួកគេគេ បានឡើងមកឈរ នៅបន្ទាប់ក្រុមអាស៊ីអឺរ៉ុប ទៅហើយ។
យ៉ាងណាមិញ ខ្សែប្រយុទ្ធដ៏ឆ្នើមរបស់ក្រុមណាហ្គាវើលដ៍ Marcio កាន់តែបង្ហាញពីការលេងកាន់តែល្អ ដើម្បីជួយឱ្យ ណាហ្គាវើលដ៍ អាចបន្តយកឈ្នះលើក្រុមអង្គរថាយហ្គឺរ ៤-២ កាលពីថ្ងៃសៅរ៍ ហើយការរកបាន២គ្រាប់បន្ថែមទៀតនេះ បានធ្វើឱ្យ Marcio មានគ្រាប់បាល់ទាត់បញ្ចូលទីសរុបចំនួន១៥គ្រាប់ ដើម្បីឡើងទៅឈរនៅកំពូលតារាង ក្នុងនាមជាអ្នករកបានគ្រាប់បាល់ច្រើនជាងគេ ជាបណ្តោះអាសន្ន៕
