បរទេស៖ Napoli បានឡើងទៅឈរលើកំពូលតារាងនៃក្របខ័ណ្ឌ Serie A កាលពីថ្ងៃចន្ទ ក្រោយពីដណ្តើមបានជ័យជម្នះក្នុងលទ្ធផល ៤-០ នៅលើទឹកដីក្រុម Udinese ដើម្បីរក្សាកំណត់ត្រាឈ្នះ១០០%របស់ពួកគេនៅដើមរដូវកាលនេះ។
គ្រាប់បាល់ស៊ុតបញ្ចូលទីពីសំណាក់កីឡាករ Victor Osimhen, Amir Rrahmani, Kalidou Koulibaly និង Hirving Lozano បានជួយឲ្យក្រុមរបស់លោក Luciano Spalletti ដណ្តើមបានជ័យជម្នះយ៉ាងកក់ក្តៅនៅកីឡដ្ឋាន Dacia Arena ដើម្បីដណ្តើមបាន១២ពិន្ទុពេញពីការប្រកួត៤លើក ដោយនាំមុខ២ពិន្ទុលើក្រុម Inter Milan និង AC Milan ដែលកំពុងតែស្ថិតក្នុងចំណាត់ថ្នាក់លេខ២ និងលេខ៣ រៀងៗខ្លួន។ Roma កំពុងតែដេញតាមពីក្រោយ១ពិន្ទុបន្ថែមទៀត រួមជាមួយនឹងក្រុម Fiorentina ស្របពេលដែល Napoli គឺជាក្រុមតែមួយដែលឈ្នះរាល់ការប្រកួតទាំង៤លើករបស់ពួកគេមកទល់ពេលនេះ ក្នុងក្របខ័ណ្ឌកំពូលរបស់អ៊ីតាលី។
ស្របពេលដែល Udinese កំពុងតែស្ថិតក្នុងចំណាត់ថ្នាក់លេខ៧ ដោយមាន៧ពិន្ទុស្មើជាមួយនឹងក្រុម Lazio, Atalanta និង Bologna។ Napoli នឹងវិលទៅប្រកួតវិញនៅថ្ងៃព្រហស្បតិ៍ នៅលើទឹកដីក្រុម Sampdoria សម្រាប់កម្មវិធីប្រកួតនៅពាក់កណ្តាលសប្តាហ៍។ ដោយឡែក ក្រុមម្ចាស់ការពារជើងឯក Inter Milan ដែលទើបតែផ្តួលក្រុម Bologna ៦-១ នឹងធ្វើដំណើរទៅកាន់ទឹកដីក្រុម Fiorentina នៅរាត្រីនេះ៕
ប្រភពព័ត៌មាន៖ Channel News Asia