បរទេស៖ លោក Nuno Espirito Santo អ្នកចាត់ការទូទៅរបស់ក្រុម Tottenham ជឿជាក់ថា ការធ្លាក់ចុះទម្រង់លេងរបស់ខ្សែប្រយុទ្ធ Harry Kane នៅដើមរដូវកាលនេះ គឺដោយសារតែការខ្វះភាពស៊ីសង្វាក់គ្នានៅរដូវកាលនេះ។
Kane មិនទាន់រកគ្រាប់បាល់បញ្ចូលទីនៅឡើយទេក្នុងក្របខ័ណ្ឌ Premier League នៅរដូវកាលនេះ ស្របពេលដែលមានការលើកឡើងថា ខ្សែប្រយុទ្ធរូបនេះកំពុងតែជួបភាពត្រដាបត្រដួសដោយសារតែបញ្ហាពីការព្យាយាមរបស់គេដើម្បីបង្ខំឲ្យមានការផ្ទេរទៅកាន់ក្លិប Manchester City។ ក្រោយពីបានជួបការខកចិត្តដោយសារតែការបដិសេធរបស់ក្លិប Tottenham ក្នុងការលក់រូបគេទៅឲ្យក្លិប Man City ខ្សែប្រយុទ្ធ Kane បានអះអាងថា រូបគេមានកិច្ចព្រមព្រៀងយល់យោគគ្នាមួយជាមួយនឹងក្លិប Spurs ថា រូបគេអាចចាកចេញបាន។
ប្រធានក្រុមនៃក្រុមជម្រើសជាតិអង់គ្លេសរូបនេះ បានវិលទៅហ្វឹកហាត់មុនបើករដូវកាលវិញ និងបានអវត្តមានក្នុងការប្រកួតបើកឆាកក្នុងពេល Spurs បានយកឈ្នះលើក្រុម Man City នៅមុនពេលទទួលស្គាល់ពីការបរាជ័យរបស់គេថា រូបគេមិនអាចចូលរួមជាមួយនឹងក្រុមរបស់លោក Pep Guardiola ឡើយ។ Kane ហាក់ដូចជាមិនមែនជាកីឡាករម្នាក់ដែលបានឈ្នះស្បែកជើងមាសក្នុងក្របខ័ណ្ឌ Premier League កាលពីរដូវកាលមុនឡើយ។ រូបគេមិនទាន់បានស៊ុតបាល់បញ្ចូលទីនៅឡើយទេ ក្នុងចំណោមការប្រកួត៤លើកនៃក្របខ័ណ្ឌ Premier League និងបានលេងរហូតដល់៩០នាទីជាលើកដំបូងរបស់គេ ប៉ុន្តែ មិនបានស៊ុតបាល់ឲ្យចំគោលដៅសូម្បីតែ១ជើងក្នុងពេលចាញ់លើទឹកដីក្រុម Crystal Palace កាលពីថ្ងៃទី១១ ខែកញ្ញា៕
ប្រភពព័ត៌មាន៖ Channel News Asia