បរទេស៖ ក្រុម Inter Milan បានបង្ហាញពីការស្រេកឃ្លានរបស់ពួកគេរបស់ពួកគេក្នុងការការពារពានក្របខ័ណ្ឌ Serie A កាលពីថ្ងៃអង្គារ ក្រោយពីបានវាយបកតាមពីក្រោយ១គ្រាប់ ដើម្បីដណ្តើមបានជ័យជម្នះក្នុងលទ្ធផល ៣-១ នៅលើទឹកដីក្រុម Fiorentina និងឡើងឈរលើកំពូលតារាង។
ក្រុមរបស់លោក Simone Inzaghi បានវាយបកដើម្បីយកឈ្នះក្នុងការប្រកួតដ៏ស្វិតស្វាញជាមួយនឹងក្រុម Fiorentina នៅទីក្រុង Florence និងដណ្តើមបាន៣ពិន្ទុពេញ ក្រោយពីការរកគ្រាប់បាល់បញ្ចូលទីនៅតង់ទី២ពីសំណាក់ Matteo Darmian, Edin Dzeko និង Ivan Perisic។ ក្រុមម្ចាស់ការពារជើងឯក Inter Milan មិនស្គាល់ចាញ់សោះក្នុងការប្រកួត៥លើកដំបូងរបស់ខ្លួន និងកំពុងតែនាំមុខលើកំពូលតារាងដោយមាន១៣ពិន្ទុ និងនាំមុខ១ពិន្ទុលើក្រុម Napoli ដែលនឹងត្រូវប្រកួតជាមួយនឹងក្រុម Sampdoria នៅថ្ងៃព្រហស្បតិ៍ ហើយនិងសម្លឹងរកការរក្សាកំណត់ត្រាឈ្នះ១០០%របស់ពួកគេនៅរដូវកាលនេះ។
ខ្សែប្រយុទ្ធ Dzeko បានឲ្យដឹងថា៖ «ជ័យជម្នះនៅថ្ងៃនេះ គឺជាជ័យជម្នះមួយក្នុងចំណោមជ័យជម្នះដ៏កក់ក្តៅ ពីព្រោះយើងជាក្រុមដ៏ខ្លាំងមួយ។ យើងបានជួបការលំបាកនៅតង់ទី១ និងបានវាយបកវិញនៅតង់ទី២»៕
ប្រភពព័ត៌មាន៖ Channel News Asia
