ក្រុមសិង្ហក្រហម ភ្នំពេញក្រោន បានឡើងទៅឈរនៅកំពូលតារាងវិញហើយ បន្ទាប់ពីពួកគេ បានយកឈ្នះក្រុមគិរីវង់សុខសែនជ័យ នៅលើទឹកដីខ្លួនឯង កាលពីម្សិលមិញ គឺក្រោយពេល ក្រុមព្រះខ័នរាជស្វាយរៀង បានផ្តល់ការខកចិត្តជាថ្មីម្តងទៀត ឱ្យក្រុមណាហ្គាវើលដ៍ ចំណែកក្រុមការពារតំណែងជើងឯក បឹងកេត នឹងត្រូវធ្វើដំណើរទៅជួបក្រុមកងយោធពលខេមរភូមិន្ទ (ទ័ព) នៅរសៀលថ្ងៃព្រហស្បតិ៍នេះ។
បើទោះបីជាក្រុមភ្នំពេញក្រោន ទើបទទួលបានការខកចិត្ត ជាលើកដំបូង ក្រោយចេញក្រុមព្រះខ័នរាជស្វាយរៀង ១-០ កាលពីថ្ងៃសៅរ៍ ប៉ុន្តែការពួកគេ មិនបានបង្ហាញភាពស្ទាក់ស្ទើរ ក្នុងការយកឈ្នះក្រុមគិរីវង់សុខសែនជ័យ ដោយលទ្ធផល ៣-១ នោះឡើយ ខណៈ៣គ្រាប់នេះ រកបានដោយកីឡាករខ្មែរទាំងអស់។
តាមរយៈការប្រកួត កាលពីយប់ថ្ងៃពុធនោះ ខ្សែប្រយុទ្ធ ប្រាក់ ធីវ៉ា បានបង្ហាញភាពលេចធ្លោរខ្លាំង ដោយអាចរកបាន២គ្រាប់តែម្នាក់ឯង នៅនាទីទី៥២ និងទី៧៧ គឺចន្លោះពេលដែលកីឡាករមានល្អិត ពៅ ប៊ុនវិទ្ធី រកបាន១គ្រាប់ទៀត នៅនាទីទី៦៤ ចំណែក១គ្រាប់របស់ គិរីវង់ រកបានដោយកីឡាករកម្ពុជាក្រោម ដាវ នីម នៅនាទីទី៦៩។
តាមរយៈលទ្ធផលនេះ បានជួយឱ្យក្រុមភ្នំពេញក្រោន ឡើងទៅឈរនៅលេខ១ ជាថ្មីម្តងទៀត បើទោះបីជា ពួកគេ មាន៣១ពិន្ទុស្មើជាមួយក្រុមស្វាយរៀង ដែលបានបន្តយកឈ្នះក្រុមណាហ្គាវើលដ៍ ២-១ ក្នុងថ្ងៃជាមួយគ្នានោះក៏ដោយ ព្រោះ ភ្នំពេញក្រោន មានគ្រាប់បាល់ចំណេញច្រើនជាងចំនួន៨គ្រាប់។
ដោយឡែកក្រុមការពារតំណែងជើងឯក បឹងកេត នឹងត្រូវប្រកួតប្រជែងជាមួយក្រុមម្ចាស់ផ្ទះ ទ័ព នៅកីឡដ្ឋានស្តាតចាស់ នារសៀលម៉ោង ៣:៣០ ថ្ងៃព្រហស្បតិ៍នេះ ហើយនេះជាការប្រជែងគ្នា ដើម្បីដណ្តើមយក៣ពិន្ទុដ៏សំខាន់ ដើម្បីរំកឹលទៅរកចំណាត់ថ្នាក់កាន់តែល្អ ខណៈពេលនេះ បឹងកេត កំពុងឈរនៅលេខ៥ មាន២៧ពិន្ទុ ចំណែកក្រុមទ័ព ឈរនៅលេខ៦ មាន២២ពិន្ទុ៕
