ការរកបានត្រឹម១គ្រាប់របស់ខ្សែប្រយុទ្ធវ័យក្មេង សៀង ចន្ធា បានជួយឱ្យក្រុមបឹងកេត របស់លោក គីម ភក្តី បានទទួលជ័យជម្នះលើក្រុមម្ចាស់ផ្ទះ កងយោធពលខេមរភូមិន្ទ (ទ័ព) ១-០ យ៉ាងរំភើប នៅក្រុមផ្ទៃមេឃដ៏ស្រទំ នៃកីឡដ្ឋានស្តាតចាស់ កាលពីថ្ងៃព្រហស្បតិ៍ ម្សិលមិញ។
បើទោះបីជាការប្រកួតនេះ មានភាពតានតឹងខ្លាំង ខណៈក្រុមទាំង២ បានព្យាយាមវាយបកសងគ្នាទៅវិញទៅមក ក្នុងបំណងរកបានគ្រាប់បាល់រៀងៗខ្លួន ប៉ុន្តែអ្នកគាំទ្រ ដែលបានទស្សនានេះ តាមរយៈការផ្សាយផ្ទាល់នោះ បានទន្ទឹងរង់ចាំ រហូតដល់នាទីទី៧០ ទើបមានគ្រាប់បាល់ដំបូង កើតឡើង ហើយក៏ជាគ្រាប់បាល់ចុងក្រោយ ដើម្បីកាត់សេចក្តី ពីសង្រ្គាមលើវាលស្មៅ ដណ្តើម៣ពិន្ទុ រវាងក្រុមទ័ព និងបឹងកេត ផងដែរ។
គ្រាប់បាល់ ដែលបានកើតមានឡើងយ៉ាងរំភើបនោះ គឺជាការលោតតែតបាល់បញ្ចូលទីរបស់ខ្សែប្រយុទ្ធវ័យក្មេងពាក់លេខ៩ សៀង ចន្ធា នៅពេលរូបគេ បានទទួលបាល់ ពីការលើកពីចម្ងាយចូលតំបន់គ្រោះថ្នាក់របស់មិត្តរួមក្រុម ឱ ភារុណ ហើយការរកបាន១គ្រាប់ដ៏មានន័យនេះ បានជួយឱ្យ បឹងកេត នៅតែរក្សាបាននូវជ័យជម្នះលើក្រុមទ័ព បន្ថែមទៅលើការឈ្នះ ២-០ កាលពីជើងទី១។
ន្ថែមលើកនេះ ការឈ្នះបាន៣ពិន្ទុលើកនេះ បានជួយឱ្យ បឹងកេត អាចបន្តដំណើរទៅមុខយ៉ាងរលូន ដើម្បីទៅឈរនៅលេខ៣ ជាបណ្តោះអាសន្ន ហើយការមាន៣០ពិន្ទុ នៅក្នុងនៅពេលនេះ អាចបញ្ជាក់បានថា បឹងកេត មានឱកាសគ្រប់គ្រាន់ ក្នុងការប្រជែងយកពានមួយនេះ ជាមួយក្រុមឈរនៅក្នុងតំបន់កំពូលតារាងទាំង៨ (Top8) នេះ ជាពិសេសក្រុមព្រះខ័នរាជស្វាយរៀង និងភ្នំពេញក្រោន ដែលកំពុងឈរនៅលេខ១ និងលេខ២ ដោយមាន៣១ពិន្ទុស្មើគ្នា រួមទាំងក្រុមវិសាខា ដែលបានធ្លាក់ទៅឈរនៅលេខ៤ តែវិសាខា មិនទាន់ប្រកួតជំនួបលើកទី១៤របស់ពួកគេ ជាមួយក្រុមម្ចាស់ផ្ទះ អង្គរថាយហ្គឺរ នៅឡើយទេ ដោយសារការប្រកួតនេះ ត្រូវបានលើកពេល ដោយសារអាជ្ញាធរ បានសម្រេចបិទខ្ទប់ ខេត្តសៀមរាប ចំនួន១សប្តាហ៍ នាពេលកន្លងមកនេះ៕
