ខ្សែប្រយុទ្ធ ចាន់ វឌ្ឍនាកា និងខ្សែបម្រើកណ្តាល ច្រឹង ពលរដ្ឋ ដែលខកខានបានចូលក្រុមជម្រើសជាតិ អស់រយៈពេលជាច្រើនឆ្នាំមកហើយនោះ ត្រូវបានកោះហៅឱ្យចូលរួមជាមួយក្រុមជម្រើសជាតិកម្ពុជា សម្រាប់ត្រៀមការប្រកួតវគ្គ Play off នៃពានរង្វាន់ AFC ASIAN CUP CHINA 2023 Qualifiers និងវគ្គជម្រុះពានរង្វាន់ AFC U23 ASIAN CUP Uzbekistan 2022 ដែលការប្រកួត នឹងចាប់ផ្ដើមពីថ្ងៃទី៩ ដល់ថ្ងៃទី២៦ ខែតុលា ឆ្នាំ២០២១ នៅប្រទេសបារ៉ែន និងជប៉ុន។
ខ្សែប្រយុទ្ធរបស់បឹងកេត ចាន់ វឌ្ឍនាកា និងខ្សែបម្រើ ច្រឹង ពលរេដ្ឋ របស់ក្លិបវិសាខា ដែលធ្លាប់បង្ហាញទម្រង់លេងយ៉ាងល្អបំផុត នៅក្នុងក្រុមជម្រើសជាតិកម្ពុជា នោះ បានបាត់ឈ្មោះពីបញ្ជីឈ្មោះក្រុមជម្រើសជាតិ អស់រយៈពេលចូល៥ឆ្នាំមកហើយ បន្ទាប់ពីអ្នកទាំង២ មិនសូវបានបង្ហាញខ្លួន នៅលើទីលាន ដោយសារសារបញ្ហារបួស និងបញ្ហាផ្ទាល់ខ្លួនមួយចំនួន ធ្វើឱ្យទម្រង់លេង មានការធ្លាក់ចុះនោះ។
យ៉ាងណាក៏ដោយ តាមរយៈបញ្ជីឈ្មោះក្រុមជម្រើសជាតិកម្ពុជា ដែលសហព័ន្ធកីឡាបាល់ទាត់កម្ពុជា បានប្រកាស កាលពីព្រឹកថ្ងៃចន្ទនេះ គឺ ចាន់ វឌ្ឍនាកា និង ច្រឹង ពលរដ្ឋ ត្រូវបានអ្នកចាត់ការទូទៅលោក Keisuke Honda និងក្រុមគ្រូបង្វឹកក្រុមជម្រើសជាតិកម្ពុជា បានផ្តល់ទំនុកចិត្ត ដល់អ្នកទាំង២ ជាថ្មី ដើម្បីដាក់ឱ្យចូលរួមជាមួយក្រុមជម្រើសជាតិកម្ពុជា ឡើងវិញ ប៉ុន្តែបញ្ជីឈ្មោះលើកនេះ គ្មានវត្តមានខ្សែប្រយុទ្ធជើងចាស់ ប្រាក់ មុន្នីឧត្តម និងខ្សែការពារ ធារី ចន្ថាប៊ីន នោះទេ។
ការមានឈ្មោះនៅក្នុងក្រុមជម្រើសជាតិ សារឡើងវិញនេះ ក៏ព្រោះតែ ចាន់ វឌ្ឍនាកា បានបង្ហាញទម្រង់ល្អឡើងវិញ និងបានក្លាយជាខ្សែប្រយុទ្ធយ៉ាងសំខាន់ ដែលអាចជួយឱ្យបឹងកេត ឱ្យទទួលបានជ័យជម្នះជាបន្តបន្ទាប់ ហើយ ច្រឹង ពលរដ្ឋ ក៏បានបង្ហាញខ្លួន នៅក្នុងជម្រើសជាតិ១១នាក់ដំបូង របស់ក្រុមវិសាខា បានញឹកញាប់ ឡើងវិញ ផងដែរ ជាមួយទម្រង់លេង គួរឱ្យចាប់អារម្មណ៍ ផងដែរ។
ជាមួយគ្នានេះ ក្រុមជម្រើសជាតិកម្ពុជា ដែលមានការច្របាច់បញ្ចូលគ្នារវាងក្រុមU23ជម្រើសជាតិ និងក្រុមធំជម្រើសជាតិនោះ គឺបានហោះហៅកីឡាវ័យក្មេងជាង១០នាក់ ឱ្យចូលរួមបំបេញបេសកកម្ម ជូនជាតិ លើកនេះ ផងដែរ ក្នុងនោះរួមានកីឡាករ វីរៈ ដារ៉ា, ចាន់ សារ៉ាពេជ្រ, លីម អារុណរ៉េយមិន, គី រីណា, ស៊ិន សុវណ្ណមករា, ជួន ចាន់ចាវ, ឡុង ម៉េងហាវ, មិន រតនៈ, អ៊ាន ពិសី, ជឿន ណាចា, ញាណ សុស៊ីដាន, រដ្ឋ សំណាង និង រ៉េត លីហេង ចំណែក សឿត បារាំង និង ណារ៉ុង កក្កដា ក៏ត្រូវបានកោះហៅឱ្យចូលជម្រើសជាតិ ថ្មីផងដែរ ខណៈកីឡាករវ័យក្មេង ញឹម លីហួរ, ឡេង ណូរ៉ា និង ស រតនា ត្រូវបានកោះហៅឱ្យចូលរួមជាមួយក្រុមជម្រើសជាតិ ជាលើកទី២៕