បរទេស៖ ក្រុម Paris saint-Germain និង Manchester City មានឱកាសដូចគ្នាក្នុងការបង្កើតឲ្យមានការភ្ញាក់ផ្អើលមួយ នៅក្នុងក្របខ័ណ្ឌ Champions League នៅពេលដែលពួកគេជួបគ្នាក្នុងការប្រកួតវគ្គចែកពូលនាកីឡដ្ឋាន Parc des Princes នៅរាត្រីនេះ ដែលនឹងតម្រូវឲ្យលោក Pep Guardiola និងអតីតកូនសិស្សរបស់លោក Lionel Messi ជួបគ្នាម្តងទៀត។
ក្លិប PSG ដែលមានម្ចាស់កម្មសិទ្ធិជាសេដ្ឋកាតា និងក្លិប Man City ដែលមានម្ចាស់កម្មសិទ្ធិជាសេដ្ឋីត្រកូលអាប៊ូដាប៊ី បានផ្លាស់ប្តូរមុខមាត់កីឡាបាល់ទាត់ទ្វីបអឺរ៉ុប ក្នុងរយៈពេល១ទសវត្សរ៍ចុងក្រោយនេះ តាមរយៈការចំណាយប្រាក់ជាច្រើនដើម្បីទទួលបានភាពជោគជ័យក្នុងក្របខ័ណ្ឌ Champions League ខណៈដែលក្លិបទាំង២ សុទ្ធសឹងមិនទាន់បានឈ្នះដូចគ្នា។ Man City ស្ទើរតែបានឈ្នះពាននេះកាលពីរដូវកាលមុនទៅហើយ នៅពេលដែលពួកគេបានផ្តួលក្រុម PSG ក្នុងវគ្គពាក់កណ្តាលផ្តាច់ព្រ័ត្រ នៅមុនពេលចាញ់ក្រុម Chelsea ក្នុងវគ្គផ្តាច់ព្រ័ត្រ នៅទីក្រុង Porto។
ក្រុម PSG ដែលជាម្ចាស់ជើងឯករងក្នុងឆ្នាំ២០២០ នឹងចង់សងសឹកចំពោះការចាញ់នោះ ប៉ុន្តែ ពួកគេបានយកឈ្នះលើក្រុមម្ចាស់ជើងឯករបស់អង់គ្លេសមួយនេះមួយចំណុចរួចជាស្រេច តាមរយៈការចុះហត្ថលេខាជាមួយនឹង Messi ដែលហាក់ដូចជាត្រូវផ្ទេរទៅកាន់កីឡដ្ឋាន Etihad ទៅហើយ។ លោក Guardiola បានឲ្យដឹងថា៖ «យើងដឹងពីសមត្ថភាព Messi រួចហើយ ហេតុនេះ ខ្ញុំមិនបាច់រៀងរាប់ពីរូបគេឡើយ។ អ្វីដែលរូបគេបានធ្វើគឺលើសពីភាពអស្ចារ្យទៅទៀត ហើយជាការរំពឹងទុក នៅថ្ងៃស្អែកនេះ រូបគេអាចលេងដើម្បីផលប្រយោជន៍ការប្រកួតនេះ»៕
ប្រភពព័ត៌មាន៖ Channel News Asia