សហព័ន្ធកីឡាបាល់ទាត់កម្ពុជា មិនអាចដេញថ្លៃបានសម្រេច ក្នុងការនាំយកការប្រកួតពានរង្វាន់ AFF Suzuki Cup 2020 មកធ្វើនៅពហុកីឡដ្ឋានជាតិមរតកតេជោ ទៅតាមផែនការ ដែលខ្លួនបានដាក់ចេញនោះទេ បើទោះបីជា ការដាក់ពាក្យស្នើសុំដេញថ្លៃនេះ ទទួលបានការគាំទ្រពេញទំហឹង ពីលោកនាយករដ្ឋមន្រ្តី ហ៊ុន សែន និងគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ ក៏ដោយ។
ក្រោមគំនិតផ្តួចផ្តើមរបស់លោក សៅ សុខា ប្រធានសហព័ន្ធកីឡាបាល់ទាត់កម្ពុជា គឺកម្ពុជា បានសម្រេចដាក់ពាក្យស្នើសុំដេញថ្លៃ ជាមួយប្រទេស៤ទៀត រួមមាន វៀតណាម ឥណ្ឌូនេស៊ី ថៃ និងសិង្ហបុរី ដើម្បីនាំយកព្រឹត្តិការណ៍ថ្នាក់តំបន់មួយនេះ មកធ្វើនៅពហុកីឡដ្ឋានជាតិមរតកតេជោ នៅមុនពេលពហុកីឡដ្ឋានថ្មីនេះ ក្លាយជាកន្លែងដ៏សំខាន់ ក្នុងការរៀបចំធ្វើម្ចាស់ផ្ទះ ស៊ីហ្គេម ឆ្នាំ២០២៣។
ប៉ុន្តែក្រោយកិច្ចប្រជុំពិភាក្សា និងការសម្រេចចុងក្រោយរបស់ AFF កាលពីថ្ងៃអង្គារ ម្សិលមិញ គឺស្ថាប័នមួយនេះ បានបានសម្រេចផ្ដល់សិទ្ធិឱ្យប្រទេសសិង្ហបុរី ធ្វើម្ចាស់ផ្ទះ ការប្រកួតបាល់ទាត់ជើងឯកអាស៊ីអាគ្នេយ៍ AFF Suzuki Cup 2020 នេះ ជាផ្លូវការហើយ ខណៈព្រឹត្តិការណ៍នេះ នឹងចាប់ផ្ដើមពីថ្ងៃទី៥ ខែធ្នូ ឆ្នាំ២០២១ ដល់ថ្ងៃទី០១ ខែមករា ឆ្នាំ២០២២ ខាងមុខ។
តាមរយៈការសម្រេចរបស់ AFF នេះ បានបញ្ជាក់ថា កម្ពុជា មិនទទួលបានជោគជ័យ សម្រាប់ការដាក់ពាក្យស្នើសុំធ្វើជាម្ចាស់ផ្ទះនេះទេ គឺកម្ពុជា បានត្រឹមធ្វើជាភ្ញៀវ ខណៈការប្រកួត AFF Suzuki Cup 2020 នេះ បានចាប់ឆ្នោត និងបែងចែកពូលរួចហើយ ដោយក្នុងនោះ កម្ពុជា ស្ថិតក្នុងពូល B ជាមួយវៀតណាម ម៉ាឡេស៊ី ឥណ្ឌូនេស៊ី និងឡាវ។ រីឯពូល A គឺមានម្ចាស់ផ្ទះសិង្ហបុរី ថៃ មីយ៉ាន់ម៉ា ហ្វីលីពីន និងក្រុមឡើងមកពីវគ្គជម្រុះ រវាង ប្រ៊ុយណេ និងទីម័រខាងកើត៕
