ការមានការស្រេកឃ្លានក្នុងការឈ្នះពាន Suzuki Cup នឹងមិនគ្រប់គ្រាន់ក្នុងការបញ្ចប់ការមិនធ្លាប់ឈ្នះពានប្រចាំតំបន់អាស៊ីអាគ្នេយ៍មួយនេះរបស់ក្រុមជម្រើសជាតិឥណ្ឌូនេស៊ី បានឡើយ។
នេះបើយោងទៅតាមការលើកឡើងរបស់លោកគ្រូបង្វឹក Shin Tae-yong ស្របពេលដែលលោកជំរុញឲ្យក្រុមរបស់លោកលេងឲ្យអស់ពីសក្តានុពលរបស់ខ្លួនក្នុងវគ្គផ្តាច់ព្រ័ត្រពេលប្រកួតជាមួយនឹងក្រុមម្ចាស់ជើងឯក៥សម័យកាល ថៃ។ ក្រុមទាំង២ នឹងជួបគ្នានៅរាត្រីនេះ ក្នុងការប្រកួតបើកឆាកនៃវគ្គផ្តាច់ព្រ័ត្រដែលមាន២ជើង ក្នុងប្រទេសសិង្ហបុរី ដែលជាកន្លែងដែលយុទ្ធនាការប្រចាំតំបន់មួយនេះ ត្រូវបានរៀបចំឡើងក្នុងប្រទេសតែមួយ ដោយសារតែវិបត្តិកូវីដ ១៩។ ការប្រកួតជើងទី២ នឹងប្រព្រឹត្តទៅនៅថ្ងៃសៅរ៍។
ក្រុមបាល់ទាត់ជម្រើសជាតិឥណ្ឌូនេស៊ី មិនធ្លាប់បានឈ្នះពាន AFF Suzuki Cup សោះ បើគិតចាប់តាំងពីការបង្កើតពាននេះឡើងក្នុងឆ្នាំ១៩៩៦ ហើយលោក Shin បាននិយាយថា ពួកគេនឹងមិនក្លាយជាម្ចាស់ជើងឯក ដោយសារតែពួកគេចង់ឡើយ។ លោក Shin បានឲ្យដឹងថា៖ «ខ្ញុំចង់ក្លាយជាម្ចាស់ជើងឯកនៅពេលនេះ ប៉ុន្តែ ការលើកពាន មិនកើតឡើង ដោយសារតែអ្នកចង់លើកពាននោះឡើយ»៕
ប្រភពព័ត៌មាន៖ Channel News Asia
