បរទេស៖ លោក Tan Cheng Hoe បានលាលែងពីតំណែងក្នុងនាមជាគ្រូបង្គោលនៃក្រុមបាល់ទាត់ជម្រើសជាតិម៉ាឡេស៊ី ក្រោយពីក្រុមរបស់លោកបានទទួលបរាជ័យក្នុងការឆ្លងទៅវគ្គពាក់កណ្តាលផ្តាច់ព្រ័ត្រ ក្នុងព្រឹត្តិការណ៍ AFF Suzuki Cup ឆ្នាំ២០២០ នៅសិង្ហបុរី កាលពីខែមុន។ នេះបើយោងទៅតាមការប្រកាសរបស់សហព័ន្ធកីឡាបាល់ទាត់ម៉ាឡេស៊ី (FAM) កាលពីថ្ងៃចន្ទ។
លោក Mohd Saifuddin Abu Bakar អគ្គលេខាធិការសហព័ន្ធកីឡាបាល់ទាត់ម៉ាឡេស៊ី បាននិយាយថា លោ Tan បានបញ្ជាក់ពីបំណងរបស់លោកក្នុងការលាលែងពីតំណែង អំឡុងពេលនៃកិច្ចប្រជុំមួយជាមួយនឹងថ្នាក់ដឹកនាំនៃអង្គភាពគ្រប់គ្រងកីឡាបាល់ទាត់ជាតិមួយនេះ កាលពីពេលថ្មីៗនេះ។
លោក Saifuddin បានឲ្យដឹងក្នុងសេចក្តីថ្លែងការណ៍មួយថា៖ «សហព័ន្ធសូមបង្ហាញពីការកោតសរសើរយ៉ាងជ្រាលជ្រៅចំពោះលោក Cheng Hoe ដែលបានបម្រើការងារឲ្យសហព័ន្ធអស់រយៈពេល១៤ឆ្នាំ បើគិតចាប់តាំងពីលោកមានតួនាទីជាជំនួយការគ្រូបង្វឹកក្នុងក្រុមជម្រើសជាតិអាយុក្រោម២០ឆ្នាំ ក្នុងឆ្នាំ២០០៥»៕
ប្រភពព័ត៌មាន៖ Channel News Asia