បរទេស៖ ក្រុមបាល់ទាត់ជម្រើសជាតិថៃ បានកក់កៅអីរបស់ពួកគេទៅកាន់វគ្គផ្តាច់ព្រ័ត្រនៃព្រឹត្តិការណ៍ AFF Suzuki Cup ជាលើកទី៩ ក្នុងចំណោមការបង្ហាញខ្លួន១៣លើក ក្រោយពីពួកគេទទួលបានលទ្ធផលស្មើ ០-០ ជាមួយនឹងក្រុមម្ចាស់ការពារជើងឯកវៀតណាម កាលពីថ្ងៃអាទិត្យ ក្នុងការប្រកួតជើងទី២នៃវគ្គពាក់កណ្តាលផ្តាច់ព្រ័ត្រ ដើម្បីឈ្នះទាំង២ជើងក្នុងលទ្ធផល ២-០។
វៀតណាម បានគ្រប់គ្រងការប្រកួតស្ទើរតែទាំស្រុងនាកីឡដ្ឋាន National Stadium នៅប្រទេសសិង្ហបុរី ប៉ុន្តែ មិនអាចទម្លុះតំបន់ការពារដ៏រឹងមាំរបស់ថៃ ដែលបានរបូតគ្រាប់បាល់តែ១គ្រាប់គត់ ក្នុងចំណោមការប្រកួត៦លើកមកទល់ពេលនេះ បានឡើយ។ លោក Alexandre Polking គ្រូបង្វឹកនៃក្រុមជម្រើសជាតិថៃ បានឲ្យដឹងថា៖ «ខ្ញុំពិតជាមោទនភាពចំពោះកិច្ចខិតខំប្រឹងប្រែដែលកីឡាករបានខិតខំព្យាយាមនៅតំបន់ការពារ ជាពិសេសនៅក្នុងតង់ទី១ ដែលជាការបង្ហាញពីទម្រង់លេងដ៏អស្ចារ្យ។
វាបង្ហាញពីស្មារតីក្រុមដ៏គួរឲ្យកោតសរសើរ ខណៈដែលកីឡាករបានប្រកួតគ្នាយ៉ាងស្វិតស្វាញ សាមគ្គីគ្នា និងរួមគ្នាដោះស្រាយពីការដាក់សម្ពាធពីវៀតណាម»។ ក្រុមជម្រើសជាតិថៃ នឹងត្រូវធ្វើការប្រកួត២ជើងក្នុងវគ្គផ្តាច់ព្រ័ត្រ ជាមួយនឹងក្រុមជម្រើសជាតិឥណ្ឌូនេស៊ី ដែលបានផ្តួលក្រុមជម្រើសជាតិសិង្ហបុរី ដែលនៅសល់សមាជិកត្រឹមតែ៩នាក់ ក្នុងលទ្ធផល ៤-២ ក្នុងការប្រកួតជើងទី២ ដើម្បីឈ្នះទាំង២ជើងក្នុងលទ្ធផល ៥-៣។ ការប្រកួតជើងទី១នៃវគ្គផ្តាច់ព្រ័ត្រ នឹងប្រព្រឹត្តទៅនៅថ្ងៃទី២៩ ខែធ្នូ ឆ្នាំ២០២១ នាកីឡដ្ឋាន National Stadium៕
ប្រភពព័ត៌មាន៖ AFF Suzuki Cup