ក្រុមភ្នំពេញក្រោន បានឡើងទៅឈរនៅលើកំពូលតារាងនៃលីគកំពូលកម្ពុជា យ៉ាងរំភើប ហើយក៏កំពុងក្លាយជាក្រុមដែលមានអាទិភាពខ្ពស់ជាងគេ ក្នុងការឈានទៅរកការឈ្នះពាន ផងដែរ បន្ទាប់ពីពួកគេដណ្តើមបាន ៣ ពិន្ទុ ទាំងលំបាក ពីក្រុមណាហ្គាវើលដ៍ កាលពីថ្ងៃព្រហស្បតិ៍ ប៉ុន្តែក្រុមសូលទីឡូអង្គរ បានខិតកាន់តែកៀតទៅនឹងមាត់ជ្រោះ សម្រាប់ការកាត់ចេញពីលីគកំពូល នៅឆ្នាំក្រោយ។
តាមរយៈការប្រកួត នៅកីឡដ្ឋានស្តាតចាស់ កាលពីម្សិលមិញនោះ ក្រុមភ្ញៀវភ្នំពេញក្រោន បានយកឈ្នះក្រុមណាហ្គាវើលដ៍ របស់លោក មាស ចាន់ណា ៣-២ បន្ទាប់ទៅលើការស្មើគ្នា ១-១ កាលពីជើងទី១ ប៉ុន្តែការដណ្តើមបាន៣ពិន្ទុលើកនេះ ពិតជាមានភាពស្វិតស្វាញខ្លាំង។
បើទោះបីជា ខ្សែប្រយុទ្ធ Nieto និង ប្រាក់ ធីវ៉ា រកបានម្នាក់ ១ គ្រាប់ នៅនាទីទី២៣ និងទី៤៣ ដើម្បីជួយឱ្យក្រុមភ្នំពេញក្រោន នាំមុខ ណាហ្គាវើលដ៍ ២-០ នៅក្នុងតង់ទី១ ប៉ុន្តែអារម្មណ៍ច្របូកច្របល់ បានកើតមានឡើង សម្រាប់ក្រុមភ្នំពេញក្រោន នៅពេលខ្សែប្រយុទ្ធ Marcio រកបាន២គ្រាប់ឱ្យក្រុមណាហ្គាវើលដ៍ នៅនាទីទី៦២ និងទី៨០ នោះ គឺនៅចន្លោះពេលដែល Nieto រកបានគ្រាប់បាល់ទី២ របស់គេនៅនាទីទី៧៤។
ជាមួយជ័យជម្នះ ដែលទទួលបានទាំងព្រលឹងចុងសក់នេះ បានជួយឱ្យក្រុមភ្នំពេញក្រោន ឡើងទៅឈរនៅលេខ ១ ជាបណ្តោះអាសន្ន ហើយការមាន ៣៧ ពិន្ទុ បានធ្វើឱ្យពួកគេ ក្លាយជាក្រុម ដែលកំពុងមានភាគរយខ្ពស់ជាងគេ ក្នុងការឈានទៅរកការឈ្នះពាន នៅរដូវកាលនេះ។
យ៉ាងណាក៏ដោយ ការដណ្តើមបានទីតាំងកំពូល និងការកើនភាគរយឈ្នះពានរបស់ ភ្នំពេញក្រោន ក៏មានការចូលរួមយ៉ាងសំខាន់ ពីខ្សែប្រយុទ្ធវ័យក្មេងរបស់បឹងកេត សៀង ចន្ធា ផងដែរ ព្រោះការរកបាន១គ្រាប់របស់គេ ដែលកើតចេញពីកំហុសរបស់អ្នកចាំទី អាំ សុវណ្ណារ៉ាត់ នៅនាទីទី៧៩ បានបំផ្លាញឱកាសរបស់ក្រុមព្រះខ័នរាជស្វាយរៀង ក្នុងការឈ្នះបាន៣ពិន្ទុបន្ថែម។
ក្រុមព្រះខ័នរាជស្វាយរៀង គួរណាស់ ទទួលបាន៣ពិន្ទុបន្ថែម សម្រាប់ការរកបានគ្រាប់បាល់នាំមុខរបស់ខ្សែប្រយុទ្ធ Lopez នៅនាទីទី៤៩ ដែលជាការស៊ុតបាល់ពិន័យ ១១ ម៉ែត្រ បានសម្រេច ប៉ុន្តែកំហុសរបស់អ្នកចាំទី អាំ សុវណ្ណារ៉ាត់ ដែលបានគប់បាល់ ឡើងទៅលើ មិនផុតសៀង ចន្ធា នោះ នាំឱ្យ ចន្ធា ឆក់បានបាល់នោះ រួចអូសបន្តទៅមុខតែម្នាក់ឯង និងស៊ុតបំប៉ោងសំណាញ់ទីយ៉ាងល្អ នៅនាទីទី៧៩។
ជាមួយការចែកគ្នាម្នាក់ ១ ពិន្ទុ សម្រាប់ការប្រកួតលើកទី១៦ នេះ ក្រុមស្វាយរៀង បានធ្លាក់មកឈរនៅលេខ ២ ដោយមាន ៣៥ ពិន្ទុ គឺចាញ់ប្រៀប ភ្នំពេញក្រោន ២ពិន្ទុវិញ ខណៈបឹងកេត មាន ៣៤ ពិន្ទុ ស្មើជាមួយក្រុមវិសាខា ដែលទើបប្រកួតបាន ១៥ ដង ចំណែកក្រុមណាហ្គាវើលដ៍ បន្តឈរនៅលេខ ៥ មាន ២៨ ពិន្ទុដដែល។
ដោយឡែកក្រុមកំពុងឈរនៅបាតតារាង សូលទីឡូអង្គរ បានចាញ់ក្រុមនគរបាលជាតិ ១-០ ហើយលទ្ធផលនេះ បានធ្វើឱ្យពួកគេ កាន់តែខិតជិតទៅមាត់ជ្រោះ ដែលនឹងត្រូវកាត់ចេញពីលីគកំពូលកម្ពុជា ឱ្យទៅលេខនៅលីគទី២ សម្រាប់រដូវកាលក្រោយ ព្រោះពេលនេះ សូលទីឡូអង្គរ មានត្រឹម៥ពិន្ទុតិចជាងគេ។ តែទោះបីជាយ៉ាងណា សូលទីឡូអង្គរ នៅសល់ការប្រកួតក្នុងដៃច្រើនជាងគេ ហេតុនេះឱកាសប្រជែង គេចចេញពីតំបន់កាត់ចោលរបស់ពួកគេ នៅតែមានតិចតួចផងដែរ បើសិនជាពួកគេ អាចរកឃើញជ័យជម្នះ បានវិញនោះ៕
