បរទេស៖ ខ្សែប្រយុទ្ធ Lionel Messi បានរងបរាជ័យជាលើកដំបូងរបស់គេ ក្នុងនាមជាកីឡាកររបស់ Paris Saint-Germain កាលពីថ្ងៃអាទិត្យ ខណៈដែលការចាប់ផ្តើមយ៉ាងល្អឥតខ្ចោះរបស់ពួកគេក្នុងក្របខ័ណ្ឌ Ligue 1 នៅរដូវកាលនេះ បានបញ្ចប់ជាមួយនឹងការបរាជ័យក្នុងលទ្ធផល ២-០ នៅលើទឹកដីក្រុម Rennes។
ស្របពេលជាមួយគ្នានេះ ក្រុម Marseille ក៏បានរងបរាជ័យ ២-០ លើទឹកដីក្រុម Lille ផងដែរ នៅថ្ងៃដែលពួកបានកាន់ទុក្ខការស្លាប់ដ៏ចម្រូងចម្រាស់របស់អតីតប្រធានក្លិបលោក Bernard Tapie។ តារាឆ្នើមអន្តរជាតិអាហ្សង់ទីន Messi បានស៊ុតបាល់ Free-kick រំលងរបាទី នៅតង់ទី១ នាកីឡដ្ឋាន Roazhon Park នៅមុនពេលកីឡាករ Gaetan Laborde បានជួយឲ្យក្រុម Rennes រកបានគ្រាប់បាល់នាំមុខនៅមុនពេលបញ្ចប់តង់ទី១ តាមរយៈការរកបានគ្រាប់បាល់ទី៦របស់គេ។
Flavien Tait បានបន្ថែមគ្រាប់បាល់នាំមុខភ្លាមៗ ក្រោយពីលេងបានត្រឹមតែ២០វិនាទីប៉ុណ្ណោះក្នុងតង់ទី២ ខណៈដែល Kylian Mbappe ក៏បានស៊ុតបាល់បញ្ចូលទីផងដែរ ប៉ុន្តែ ជាបាល់ offside ខណៈដែល Rennes បានបញ្ចប់ការឈ្នះជាប់ៗរបស់ក្រុម PSG ត្រឹម៨ប្រកួតនៅរដូវកាលនេះ។ លោក Mauricio Pochettino គ្រូបង្វឹករបស់ PSG បានឲ្យដឹងថា៖ «យើមិនបានចាប់ផ្តើមការប្រកួតនេះយ៉ាងល្អឡើយ ប៉ុន្តែ បន្ទាប់មក យើងបានលេងយ៉ាងល្អនៅរយៈពេលពី២៥ ទៅ៣០នាទី។ វាជារឿងអាម៉ាសដែលយើងមិនអាចស៊ុតបាល់បញ្ចូលទី។ យើងបានរបូតគ្រាប់បាល់២គ្រាប់ ដែលយើងមិនអាចវាយបកបានវិញ»៕
ប្រភពព័ត៌មាន៖ Channel News Asia