បរទេស៖ គ្រាប់បាល់ស៊ុតបញ្ចូលទីយ៉ាងល្អរបស់ Nicolo Barella និងគ្រាប់បាល់ប៉េណាល់ទីរបស់កីឡាករ Domenico Berardi បានជួយឲ្យក្រុមម្ចាស់ផ្ទះអ៊ីតាលី ដណ្តើមបានជ័យជម្នះក្នុងលទ្ធផល ២-១ លើក្រុមជម្រើសជាតិបែលហ្ស៊ិក កាលពីថ្ងៃអាទិត្យ និងដណ្តើមបានលេខ៣ ក្នុងការប្រកួត National League។
ជ័យជម្នះនេះ គួរតែផ្តល់នូវការលួងចិត្តមួយដល់ក្រុមម្ចាស់ជើងឯកទ្វីបអឺរ៉ុប ដែលការរងបរាជ័យរបស់ពួកគេក្រោមស្នាដៃក្រុមអេស្ប៉ាញ ក្នុងទីក្រុងមីឡាន កាលពីថ្ងៃពុធ បានបញ្ចប់កំណត់ត្រាមិនស្គាល់ចាញ់ជាប់ៗគ្នារបស់ពួកគេ ត្រឹម៣៧ប្រកួតតែម្តង។ ពួកគេបានវិលទៅកាន់ផ្លូវនៃជ័យជម្នះវិញ ខណៈដែល Barella បានស៊ុតបាល់បញ្ចូលទីយ៉ាងល្អ ក្រោយពីចូលលេងបានត្រឹមតែ១នាទីនៅតង់ទី២ ហើយ Berardi បានបន្ថែមគ្រាប់បាល់ទី២ ពីការស៊ុតបាល់ចេញពីចំណុចពិន័យ១១ម៉ែត្រ នៅនាទី ទី៦៥ ក្រោយពីកីឡាករ Timothy Castagne បានធ្វើឲ្យកីឡាករ Federico Chiesa ដួលក្នុងប្រអប់គ្រោះថ្នាក់។ ក្រុមជម្រើសជាតិបែលហ្ស៊ិកបានវាយបក១គ្រាប់វិញនៅនាទី ទី៨៦ នៅពេលដែលកីឡាករបម្រុង Charles De Ketelaere បានបំពេញការវាយបករហ័សយ៉ាងល្អ។
បែលហ្ស៊ិក ដែលលេងដោយគ្មានខ្សែបម្រើប្រយុទ្ធដ៏ឆ្នើម Eden Hazard និងខ្សែប្រយុទ្ធ Romelu Lukaku ហើយបានដាក់ឲ្យ Kevin De Bruyne ចូលលេងនៅតង់ទី២នោះ បានស៊ុតបាល់ប៉ះនឹងរបារទី៣លើក ប៉ុន្តែ មិនបានបង្ហាញពីទម្រង់លេងដ៏រឹងមាំឡើយ៕
ប្រភពព័ត៌មាន៖ Channel news Asia
