ក្រុមជម្រើសជាតិកម្ពុជា និងក្រុមជម្រើសជាតិហ្គាម នឹងត្រូវប្រកួតជើងទី ២ នៃពានរង្វាន់ AFC Asian Cup 2023 នៅកីឡដ្ឋាន Khalifa Sport City ក្រុង Issa Town ប្រទេសបារ៉ែន នាយប់ម៉ោង ១១ ថ្ងៃអង្គារនេះ ដើម្បីកាត់សេចក្តីរកក្រុមឈ្នះដ៏ពិតប្រាកដ សម្រាប់ឡើងទៅលេង នៅវគ្គបន្ត។
ការរកបាន១គ្រាប់ របស់ខ្សែប្រយុទ្ធ ចាន់ វឌ្ឍនាកា ពីការបញ្ចូល់របស់ លឹម ពិសុទ្ធ បានជួយឱ្យក្រុមកម្ពុជា យកឈ្នះក្រុមហ្គាម ១-០ សម្រាប់ប្រកួតជើងទី ១ កាលពីថ្ងៃអាទិត្យ ប៉ុន្តែអ្នកចាត់ការទូទៅ លោក Keisuke Honda បានសម្តែងការខកចិត្ត ទៅនឹងទម្រង់លេងរបស់ក្រុមជម្រើសជាតិកម្ពុជា ផ្ទុយពីគ្រូបង្គោលក្រុមហ្គាម Sang Hoon Kim ដែលបានមើលឃើញពីចំណុចនៃក្តីសង្ឃឹម ដែលកូនក្រុមរបស់លោក ធ្វើបាន ហើយលោកជឿថា ការប្រកួតជើងទី២នេះ ក្រុមហ្គាម នឹងអាចដណ្តើមបានជ័យជម្នះមកវិញ។
«ខ្ញុំគួរតែសប្បាយចិត្ត ព្រោះយើងឈ្នះ តែខ្ញុំបែរជាខកចិត្តទៅវិញ ព្រោះទម្រង់លេងយើងមិនល្អ ដូចពេលលេងជាមួយក្រុមខ្លាំងៗ។ ទោះពេលនោះ យើងចាញ់មែន តែយើងមានទម្រង់លេងល្អប្រសើរជាងនេះ។ បើយើងរីករាយជាមួយលទ្ធផលបែបនេះ តើពេលណា ទើបយើងអាចយកឈ្នះក្រុមខ្លាំងៗក្នុងតំបន់ដូចជា វៀតណាម ឬថៃ បាននោះ?»។ នេះជាលើកឡើងរបស់លោក Keisuke Honda បន្ទាប់ពីក្រុមជម្រើសជាតិកម្ពុជា បានយកឈ្នះក្រុមជម្រើសជាតិហ្គាម ១-០ នៅក្នុងការប្រកួតជើងទី ១។
ការលើកឡើងរបស់អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda ក៏ព្រោះតែលោកមើលឃើញ ពីការធ្លាក់ចុះនៅទម្រង់លេងរបស់កូនក្រុមលោក ចំណែកអ្នកទស្សនា មួយចំនួន ក៏បានមើលឃើញថា ក្រុមកម្ពុជា មានការធ្លាក់ចុះ ផ្នែកកម្លាំង និងភាពមិនសូវស៊ីចង្វាក់គ្នា ក្នុងការបញ្ជូនបាល់ នៅក្នុងការប្រកួតតង់ទី២ ផងដែរ ហើយការឈ្នះត្រឹម ១-០ ក្នុងជើងទី១នេះ វានៅមិនទាន់អាចជួយឱ្យកម្ពុជា ងើបផុតពីក្តីបារម្ភនោះទេ ព្រោះអ្វីៗអាចនឹងប្រែប្រួល បើសិនជាពួកគេ មិនអាចរក្សាការមានប្រៀបនេះបាននោះ។
ជាមួយគ្នានេះ លោក Sang Hoon Kim គ្រូបង្វឹកក្រុមជម្រើសជាតិហ្គាម មានការជឿជាក់ថា ក្រុមរបស់លោក នឹងអាចវាយបកយកឈ្នះលើក្រុមកម្ពុជា បានវិញ សម្រាប់ការប្រកួតជើងទី ២ នេះ ដើម្បីលុបចោលការចាញ់ត្រឹម ១-០ កាលពីជើងទី១ ហើយទទួលបានឱកាស ឡើងទៅប្រកួត នៅវគ្គបន្ត។
តាមរយៈផេចហ្វេសប៊ុកផ្លូវការរបស់សមាគមបាល់ទាត់ហ្គាម លោក Sang Hoon Kim បាននិយាយក្រោយពេលក្រុមរបស់លោក ចាញ់ក្រុមកម្ពុជាថា៖ «តាមទិន្នន័យវិភាគ នៃការប្រកួត យើងបានមើលឃើញហើយថា ក្រុមរបស់យើង គ្រប់គ្រងបាល់ បានជាងក្រុមកម្ពុជា តាំងពីនាទីទី ៣០ នៃតង់ទី ១ រហូតដល់ចុងតង់ទី ២ ហើយយើងបានវាយលុកគូប្រជែង និងបង្កើតឱកាសបានច្រើន។ សកម្មភាពនេះ ជាសារនៃក្តីសង្ឃឹម សម្រាប់ការប្រកួតបន្ទាប់ ដោយកីឡាកររបស់យើង មានបំណងប្រាថ្នាចង់ឈ្នះខ្លាំងបំផុត សម្រាប់ការប្រកួតជើងទី ២នេះ»។
បន្ថែមទៅលើការជឿជាក់របស់គ្រូបង្វឹកជនជាតិកូរ៉េខាងត្បូង លោក Sang Hoon Kim
នេះ សមាគមបាល់ទាត់ហ្គាម បានឱ្យដឹងទៀតថា ក្រុមជម្រើសជាតិហ្គាម នឹងត្រៀមខ្លួនសម្រាប់ការប្រកួតចុងក្រោយនេះ ដើម្បីបានឈានទៅវគ្គបន្ត នៃពានរង្វាន់ AFC Asian Cup China ២០២៣នេះ។ បន្ទាប់ពីកម្ពុជាបានយកឈ្នះ ដោយលទ្ធផល ១-០ កាលពីជើងទី១ គឺការប្រកួតជើងទី២ ក្រុមហ្គាម ត្រូវតែឈ្នះយ៉ាងតិច ២ គ្រាប់ ដើម្បីឈានទៅវគ្គបន្តនៃការប្រកួតប្រចាំទ្វីបអាស៊ីនេះ៕
