លោកឧបនាយករដ្ឋមន្ត្រី រដ្ឋមន្ត្រីក្រសួងការជាតិ ទៀ បាញ់ ដែលជាប្រធានគណៈកម្មាធិការជាតិរៀបចំការប្រកួតអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ពិធីបើក និងពិធីបិទ នៃការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នឹងក្លាយជាព្រឹត្តិការណ៍ប្រវត្តិសាស្រ្តដ៏ធំ នៅកម្ពុជា ហើយក៏ជាពេលដែលកម្ពុជា ត្រូវបង្ហាញពីវប្បធម៌ដ៏សម្បូរបែប និងកិត្យានុភាពជាតិ ទៅកាន់ឆាកអន្តរជាតិ ផងដែរ។
«ជាមួយនឹងការជំរុញហ្វឹកហាត់លើកកម្ពស់សមត្ថភាព បច្ចេកទេស ដល់កីឡាករ កីឡាការិនីជម្រើសជាតិទាំងនៅក្នុង និងក្រៅប្រទេស ឱ្យទទួលបានគុណផលកីឡាខ្ពស់ ប្រកួតប្រជែងដណ្តើមមេដាយជូនជាតិ ការរៀបចំព្រះរាជពិធីសុំភ្លើងអាទិទេព រត់ភ្លើងគប់ និងពិធីបើក-បិទ គឺជាព្រឹត្តិការណ៍ប្រវត្តិសាស្ត្រដ៏ធំមួយ របស់ព្រះរាជាណាចក្រកម្ពុជា សម្រាប់ការទទួលធ្វើម្ចាស់ផ្ទះស៊ីហ្គេម-អាស៊ានប៉ារ៉ាហ្គេម ឆ្នាំ២០២៣»។
នេះជាការលើកឡើងរបស់ប្រធាន CAMSOC លោក ទៀ បាញ់ នៅលើផេចហ្វេសប៊ុកផ្លូវការរបស់លោក កាលពីព្រឹកថ្ងៃអង្គារ គឺស្របពេលដែល ក្រុមគណៈកម្មការអចិន្រ្តៃយ៍ CAMSOC ក្រោមអធិបតីភាពលោកបណ្ឌិត ថោន ខុន ជាអនុប្រធានអចិន្រ្តៃយ៍ បានបើកកិច្ចប្រជុំ និងពិនិត្យមើលទៅលើរបាយការណ៍លម្អិតរបស់គណៈកម្មការពិធី-បិទ នៃព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នេះ ផងដែរ។
លោក ទៀ បាញ់ បានគូសបញ្ជាក់ទៀតថា៖ «ទន្ទឹមនេះ ពិធីបើក ពិធីបិទ គឺជាការរៀបចំមួយដ៏ធំជាងគេបំផុតនៅក្នុងព្រឹត្តិការណ៍ការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដើម្បីបង្ហាញពីវប្បធម៌ដ៏សម្បូរបែប កិត្យានុភាពជាតិលើឆាកអន្តរជាតិក្នុងសម័យសន្តិភាពតេជោ សែនផងដែរ»។
គួរបញ្ជាក់ថា ការប្រកួតស៊ីហ្គេម លើកទី ៣២ នៅកម្ពុជា ត្រូវបានរាជរដ្ឋាភិបាលកំណត់យកថ្ងៃទី៥ ខែឧសភា ឆ្នាំ២០២៣ ជាថ្ងៃរៀបចំពិធីបើក ខណៈពិធីបិទ នឹងរៀបចំ នៅថ្ងៃទី ១៧ ខែឧសភា ឆ្នាំ២០២៣។ ចំណែកការប្រកួតកីឡាអាស៊ានប៉ារ៉ាហ្គេម លើកទី១២ សម្រាប់ក្រុមអត្ថពលិកជនពិការ នៅកម្ពុជា នឹងរៀបចំការប្រកួតពីថ្ងៃទី១ ដល់ថ្ងៃទី ១០ ខែមិថុនា ឆ្នាំ២០២៣ ៕