បរទេស៖ លោក Ole Gunnar Solskjaer នឹងមិនរងនូវការបណ្តេញចេញដោយពីក្លិប Manchester United ឡើយ បើទោះបីពួកគេកាន់តែជួបភាពលិចលុង ក្រោយពីបានរងបរាជ័យនៅលើទឹកដីក្រុម Leicester City ក្នុងលទ្ធផល ៣-២ កាលពីថ្ងៃសៅរ៍។
អ្នកចាត់ការទូទៅរូបនេះ នៅតែទទួលបានកោតសរសើរក្នុងចំណោមក្រុមប្រឹក្សាក្លិប បើទោះបីក្រុម Man United ម្ចាស់ជើងឯកក្របខ័ណ្ឌ Premier League ១៣សម័យកាល មិនស្គាល់ឈ្នះសោះក្នុងចំណោមការប្រកួតក្របខ័ណ្ឌលីក៣លើកចុងក្រោយរបស់ពួកគេក៏ដោយ។ ការរងបរាជ័យកាលពីថ្ងៃសៅរ៍ ធ្វើឲ្យក្រុម Man United ធ្លាក់ទៅឈរក្នុងចំណាត់ថ្នាក់លេខ៥ ដោយដេញតាមពីក្រោយក្រុមលេខ៤ ១ពិន្ទុ។ ពួកគេបានទទួលជ័យជម្នះ១លើក និងចាញ់១លើក ក្នុងការប្រកួតក្របខ័ណ្ឌ Champions League វគ្គចែកពូល។ ប៉ុន្តែ ពួកគេនឹងត្រូវប្រឈមមុខនឹងការប្រកួតដ៏តានតឹងជាបន្តបន្ទាប់គ្នា ដោយត្រូវប៉ះជាមួយនឹងក្រុម Liverpool, Manchester City, Chelsea, Tottenham និង Arsenal ក្នុងការប្រកួត៩លើកបន្ទាប់ក្នុងក្របខ័ណ្ឌ Premier League។
លោក Solskjaer បានចូលរួមជាមួយនឹងក្លិប Man United ក្នុងនាមជាគ្រូបង្វឹកបណ្តោះអាសន្ន កាលពីខែធ្នូ ឆ្នាំ២០១៨ នៅមុនពេលត្រូវបានតែងតាំងជាអចិន្ត្រៃយ៍ បន្ទាប់ពីរដូវកាលស្លឹកឈើលាស់។ រូបគេបានចុះហត្ថលេខាលើកិច្ចសន្យារយៈពេល៣ឆ្នាំ កាលពីខែកក្កដា ឆ្នាំ២០២១ ជាមួយនឹងជម្រើសបន្តរយៈពេល១ឆ្នាំទៀត ដែលនឹងធ្វើឲ្យបន្តនៅជាមួយ Man United រហូតដល់ឆ្នាំ២០២៤៕
ប្រភពព័ត៌មាន៖ Channel News Asia