បរទេស៖ ក្រុម Roma របស់លោក Jose Mourinho បានរងបរាជ័យយ៉ាងអាម៉ាសក្នុងលទ្ធផល ៦-១ ក្នុងការប្រកួតក្របខ័ណ្ឌ Europa Conference League កាលពីថ្ងៃព្រហស្បតិ៍ នៅលើទឹកដីក្រុម Bodo/Glimt ដែលជាម្ចាស់ជើងឯកន័រវែស ដែលអ្នកគាំទ្ររបស់ពួកគេបានបង្កើតភាពល្បីល្បាញចំពោះការយកច្រាស់ដុះធ្មេញយក្សទៅកាន់ការប្រកួត។
ក្រុម Bodo/Glimt ដែលលេងក្នុងការប្រកួតក្របខ័ណ្ឌអឺរ៉ុបជាលើកទី១១របស់ពួកគេនៅរដូវកាលនេះ បានផ្តល់ការភ្ញាក់ផ្អើលដល់ក្រុមយក្សអ៊ីតាលីមួយនេះ ដែលបានជួបការលំបាកក្នុងការសម្របខ្លួននឹងសីតុណ្ហភាពដ៏ត្រជាក់ នៅលើទីលានសិប្បនិម្មិត នៅកីឡដ្ឋាន Arctic Circle។ កីឡាករ Erik Botheim បានស៊ុតបាល់បញ្ចូល៣គ្រាប់សម្រាប់ក្រុមន័រវែស ខណៈដែលប្រធានក្រុម Patrick Berg, Ola Solbakken និង Amahl Pellegrino ក៏បានរកគ្រាប់បាល់ផងដែរ ដើម្បីបំពេញការខកចិត្តដល់លោក Mourinho។ Bodo/Glimt បានឈ្នះពានក្របខ័ណ្ឌលីករបស់ន័រវែស ជាលើកដំបូង ក្នុងប្រវត្តិសាស្ត្ររយៈពេល១០៤ឆ្នាំរបស់ពួកគេ កាលពីរដូវកាលមុន។
លោក Mourinho បានទទួលស្គាល់កំហុសរបស់លោកចំពោះការមិនប្រើប្រាស់កីឡករក្នុងជម្រើសដំបូងជាច្រើន ដោយមិនរំពឹងទុកថា នឹងជួបលទ្ធផលបែបនេះឡើយ ហើយការសម្រេចចិត្តរបស់បានទទួលផលតបស្នង។ គ្រូបង្វឹកសញ្ជាតិព័រទុយហ្គាល់វ័យ៥៨ឆ្នាំរូបនេះ បានឲ្យដឹងថា៖ «ខ្ញុំបានសម្រេចចិត្តដាក់ជម្រើសដំបូងបែបនេះ ហេតុនេះការទទួលខុសត្រូវគឺជារូបខ្ញុំ»៕
ប្រភពព័ត៌មាន៖ Channel News Asia
