បរទេស៖ លោក Antonio Conte អ្នកចាត់ការទូទៅរបស់ក្រុម Tottenham បានដឹងភ្លាមៗថា កម្រិតក្នុងក្រុមរបស់លោក «មិនខ្ពស់ឡើយ» ក្រោយពីការរងបរាជ័យយ៉ាងអាម៉ាសក្នុងលទ្ធផល ២-១ ក្រោមស្នាដៃក្រុមស្លូវ៉េនី NS Mura ក្នុងការប្រកួតក្របខ័ណ្ឌ Europa Conference League។
បច្ចុប្បន្ន Spurs ត្រូវតែផ្តួលក្រុម Rennes លើទឹកដីខ្លួនឯង ក្នុងការប្រកួតចុងក្រោយក្នុងពូល ដើម្បីគេចផុតពីការធ្លាក់ចេញពីក្របខ័ណ្ឌលំដាប់ទី៣របស់អឺរ៉ុបមួយនេះ។ ជាមួយគ្នានេះ ពួកគេមិនអាចដេញតាមឲ្យទាន់ក្រុម Rennes នៅលើកំពូលតារាងនៃពូលឡើយ ដែលមានន័យថា ពួកគេនឹងឈានទៅវគ្គ៣២ក្រុមចុងក្រោយ ស្របពេលដែលក្រុមឈរលេខ១ក្នុងពូល នឹងឈានទៅវគ្គ១៦ក្រុមចុងក្រោយ។ Harry Kane គឺជាកីឡាករម្នាក់ក្នុងចំណោមកីឡាករ២នាក់ដែលបានរក្សាកៅអីក្នុងជម្រើសទាំង១១នាក់ដំបូង ពីក្រុមដែលបានផ្តួល Leeds United ២-១ កាលពីថ្ងៃអាទិត្យ ក្នុងក្របខ័ណ្ឌ Premier League។
គ្រូបង្វឹកសញ្ជាតិអ៊ីតាលីលោក Conte បានទទួលមេរៀនដ៏ឈឺចាប់មួយ ក្នុងការពង្រឹងក្រុមរបស់លោក ក្រោយពីបានជួបរាត្រីដ៏អាម៉ាសមុខនៅ Maribor នៅពេលប្រកួតជាមួយនឹងក្លិបមួយដែលទើបតែបង្កើតបាន៩ឆ្នាំ។ លោក Conte បានឲ្យដឹងថា៖ «ក្រោយពីរយៈពេល៣សប្តាហ៍ ខ្ញុំបានចាប់ផ្តើមយល់ពីស្ថានភាព។ វាមិនមែនជារឿងសាមញ្ញឡើយ។ នៅពេលនេះ កម្រិតក្នុងក្រុម Tottenham មិនខ្ពស់ឡើយ។ អ្នកខ្លះប្រហែលជាគិតថា ពេលខ្ញុំមកដល់ ក្រុមនេះ នឹងជោគជ័យ ហើយគិតថា ខ្ញុំគឺជាគ្រូសីលម្នាក់»៕
ប្រភពព័ត៌មាន៖ Channel News Asia