បរទេស៖ លោក Jose Mourinho បាននិយាយថា ញឿននៃគ្រួសារ រវាងក្លិប AS Roma របស់លោក និងអ្នកគាំទ្ររបស់ពួកគេ គឺជាហេតុផដ៏ចម្បងបំផុត ដែលពួកគេបានឈានទៅវគ្គផ្តាច់ព្រ័ត្រ នៃក្របខ័ណ្ឌ Europa Conference League កាលពីថ្ងៃព្រហស្បតិ៍។
គ្រូបង្វឹកសញ្ជាតិព័រទុយហ្គាល់រូបនេះ បានប្រាប់អ្នកគាំទ្ររបស់ Roma នៅមុនពេលយកឈ្នះលើក្រុម Leicester City ក្នុងលទ្ធផល ១-០ វគ្គពាក់កណ្តាលផ្តាច់ព្រ័ត្រ ជើងទី២ ថា ពួកគេមិនគួរមកកីឡដ្ឋាន ដើម្បីតែទស្សនាបាល់ទាត់ឡើយ ប៉ុន្តែ ត្រូវតែលេងបាល់ទាត់ដែរ។ ជាមួយគ្នានេះ លោក Mourinho បានស្រក់ទឹកផ្នែក ពេលឮសំឡេងកញ្ចែផ្លុំបញ្ចប់ការប្រកួត ក្រោយពីដឹកនាំក្រុម Roma ឲ្យឈានទៅប្រកួតក្របខ័ណ្ឌអឺរ៉ុប វគ្គផ្តាច់ព្រ័ត្រ ជាលើកដំបូង ក្នុងរយៈពេល៣១ឆ្នាំ។
លោកបាននិយាយបន្ទាប់ពីការប្រកួតថា៖ «ហេតុអ្វីបានជាខ្ញុំស្រក់ទឹកភ្នែក? ដោយសារតែខ្ញុំមានអារម្មណ៍ដូចដែលពួកគេមាន។ នេះគឺជាក្លិបដ៏ធំមួយដែលមិនមានបន្ទប់ដាក់ពាន។ ខ្ញុំដឹងថា វាមានន័យបែបណាចំពោះមនុស្សទាំងនេះ ហើយការរំជួលចិត្តរបស់ខ្ញុំគឺសម្រាប់ពួកគេ។ ខ្ញុំមានសំណាងណាស់ដែលស្ថិតក្នុងវគ្គផ្តាច់ព្រ័ត្រដ៏មានកិត្យានុភាព ប៉ុន្តែលទ្ធផលនេះ ធ្វើឲ្យមានអារម្មណ៍យ៉ាងពិសេស»៕
ប្រភពព័ត៌មាន៖ ESPN