ភាពល្បីល្បាញរបស់ ម៉ឺន ដា ដែលធ្លាប់ឃើញប្រកួតញឹកញាប់ នៅសង្វៀនប្រទេសថៃ និងធ្លាប់ឈ្នះបានខ្សែក្រវាត់ក្នុងប្រភេទទម្ងន់ ៥៧ គីឡូក្រាមទៀតនោះ បាននឹងកំពុងធ្វើឱ្យបេក្ខភាព ដែលត្រូវប្រកួតម៉ារ៉ាតុងដណ្តើមប្រាក់លាន នៅលើសង្វៀនថោន នាថ្ងៃអាទិត្យ មានការបារម្ភ ហើយគិតថា អាចនឹងមានការពិបាកប្រជែងយកប្រាក់រង្វាន់ ៣,៤ លានរៀល ជាមួយ ម៉ឺន ដា ណាស់។
អ្នកប្រដាល់គុនខ្មែរ ម៉ឺន ដា បានឃ្លាតពីសង្វៀនក្នុងស្រុកអស់រយៈពេលជាង ៤ ឆ្នាំមកហើយ ប៉ុន្តែការវិលវិញរបស់គេ លើកនេះ វានៅតែផ្តល់ក្តីបារម្ភទៅលើជើងខ្លាំង ធន់ អៀនឡៃ និងអ្នលកលេងកណ្តាប់ដៃ លាភ រដ្ឋា ចំណែកបេក្ខភាពជើងថ្មី សូដា លីម៉ូ មិនស្ថិតនៅក្នុងការចាប់អារម្មណ៍ សម្រាប់ការប្រកួតដណ្តើមប្រាក់លាន ក្នុងទម្ងន់ ៥៧ គីឡូក្រាម លើកនេះ នោះទេ។
លោក ជួប វុត្ថា អ្នកផ្គូផ្គងការប្រកួតប្រចាំសង្វៀនថោន បាននិយាយថា សង្វៀនថោន បានកក់បេក្ខភាព ម៉ឺន ដា ច្រើនសប្តាហ៍មកហើយ ដើម្បីដាក់ឱ្យប្រកួតកម្មវិធីនេះ ហើយវត្តមានរបស់គេ បានធ្វើឱ្យមានការទាក់ទាញខ្លាំង ចំណែក លាភ រដ្ឋា និង ធន់ អៀនឡៃ សុទ្ធតែជាជើងចាស់ មានបទពិសោធក្រាសក្រែល គឺមានតែកីឡាករ សូដា លីម៉ូ ម្នាក់ទេ ដែលមានបទពិសោធនៅខ្ចីជាងគេ តែក៏ទើបសាងសមត្ថភាពកំពុងល្អផងដែរ។
ចំណែក លោក ធន់ សុភា គ្រូបង្វឹករបស់ ធន់ អៀនឡៃ បាននិយាយថា៖ «វត្តមានកីឡាករ ម៉ឺន ដា និង លាភ រដ្ឋា ពិតជាលំបាកឈ្នះណាស់ ពិសេស ម៉ឺន ដា នេះ គឺទោះបាត់មុខយូរ នៅសង្វៀនក្នុងប្រទេស ប៉ុន្តែគេប្រកួតញឹកញាប់នៅប្រទេសថៃ ទទួលបានលទ្ធផលឈ្នះច្រើនជាងចាញ់។ តែទោះជាយ៉ាងណា ខ្ញុំកំពុងបង្វឹក ធន់ អៀនឡៃ ឱ្យបានល្អ ដើម្បីឈ្នះ ម៉ឺន ដា ក្នុងករណីចាប់ឆ្នោតជួបគ្នា នៅវគ្គជម្រុះ ៣ ទឹកដំបូង តែបើចាប់ឆ្នោតប៉ះ លាភ រដ្ឋា ឬ សុដា លីម៉ូ មិនសូវបារម្ភទេ»។
ចំណែក លាភ រដ្ឋា ក៏បានសរសេរពីសមត្ថភាពរបស់ ម៉ឺន ដា ផងដែរ ដោយបាននិយាយថា៖ «ម៉ឺន ដា ខ្លាំង តែខ្ញុំមិនធ្លាប់ប្រកួតគ្នាទេ ចំណែក ធន់ អៀនឡៃ ធ្លាប់ប្រកួតស្មើគ្នា ក្នុងម៉ាសហ្វៃ ហើយជើងថ្មី សូដា លីម៉ូ ខ្ញុំមិនបារម្ភទេ។ តែទោះយ៉ាងណា ចំពោះបញ្ហាចាញ់ ឬឈ្នះ ពិបាកនិយាយមុនណាស់ តែលើកនេះ ខ្ញុំហាត់ត្រៀមបានល្អ»។
ជាមួយគ្នានេះ លោក រឹក គី ជាគ្រូបង្វឹក ម៉ឺន ដា ក៏មិនសូវមានទំនុកខ្លាំងលើសិស្សរបស់ខ្លួនប៉ុន្មានដែរ ព្រោះ ម៉ឺន ដា ខកខានប្រកួតយូរដែរហើយ ហើយត្រូវប្រឈមជាមួយ ធន់ អៀនឡៃ និង លាភ រដ្ឋា ដែលសុទ្ធតែជើងខ្លាំង និងមានជំនាញខាងវាយសម្រុក ពិបាកក្នុងការទប់ទល់។
លោក រឹក គី បាននិយាយថា៖ «ខ្ញុំមិនហ៊ានសង្ឃឹមឈ្នះច្រើនទេ ព្រោះ ម៉ឺន ដា ខកខានប្រកួតយូរដែរហើយ ហើយមួយវិញទៀត ជើងខ្លាំង លាភ រដ្ឋា និង ធន់ អៀនឡៃ ជាកំពូលកីឡាករវាយសម្រុក និងមានសមត្ថភាពល្អ គឺពិតជាមិនអាចសង្ឃឹមឈ្នះច្រើននោះទេ ត្រឹម ៦០ ភាគរយប៉ុណ្ណោះ»៕
