ការហ៊ានលេង និងលេងប្រកបដោយភាពជឿជាក់ ដើម្បីបង្កើតឱកាសវាយបកទៅលើគូប្រកួត តាមកាលៈទេសៈជាក់ស្តែង គឺជាអ្វីដែលក្រុមជម្រើសជាតិកម្ពុជាអាយុក្រោម ២៣ ឆ្នាំ បានបង្ហាញឱ្យអ្នកគាំទ្របានឃើញ នៅពេលពួកគេ បានចាញ់ក្រុមម្ចាស់ផ្ទះជប៉ុន កាលពីប៉ុន្មានម៉ោងនេះ។
វាហាក់មិនមានអ្វីប្លែកនោះទេ ដែលក្រុមU23កម្ពុជា បានចាញ់ក្រុមម្ចាស់ផ្ទះជប៉ុន ៤-០ សម្រាប់ការប្រកួតជម្រុះប្រចាំពូល K នៃពានរង្វាន់ AFC U23 Asian Cup Uzbekistan 2022 នៅកីឡដ្ឋាន J-Village ប្រទេសជប៉ុននេះ ព្រោះកម្រិតនៃការលេង និងភាពខុសគ្នា ចំពោះការអភិវឌ្ឍបាល់ទាត់របស់ប្រទេសទាំង២នេះ វាបានបង្ហាញរួចទៅហើយថា ក្រុមកម្ពុជា មិនអាចទៅរួចជាមួយក្រុមជប៉ុន បាននោះទេ។
យ៉ាងណាក៏ដោយ សកម្មភាពប្រកួត នៅថ្ងៃនេះ បានបង្ហាញឱ្យឃើញ ពីការហ៊ានលេង និងលេងប្រកបដោយភាពជឿជាក់របស់កម្ពុជា គឺពួកគេ បានព្យាយាមបិទ និងគ្រប់គ្រងបាល់ ដើម្បីវាយបកទៅលើក្រុមជប៉ុន ទៅតាមគោលការណ៍ ដែលគ្រូបង្វឹកបានដាក់ចេញ គឺការលេងទៅតាមរបៀបរបស់កម្ពុជា។
ការរបូត៤គ្រាប់ ពីការស៊ុតទម្លុះសំណាញ់ទីរបស់ក្រុមម្ចាស់ផ្ទះជប៉ុន ដែលកើតឡើង២គ្រាប់ នៅក្នុងតង់ទី១ និង២គ្រាប់ទៀត នៅក្នុងតង់ទី២នេះ វាមិនមែនជាលទ្ធផលអាក្រក់ពេកទេ សម្រាប់កម្ពុជា ហើយអ្នកទស្សនាភាគច្រើន ក៏ពេញចិត្តទទួលយក នឹងលទ្ធផលនេះផងដែរ នៅពេលពួកគេ បានមើលឃើញពីការហ៊ានលេង និងលេងដោយឆន្ទៈពិតប្រាកដ របស់ក្រុមគោព្រៃជំទង់ ទាំងនេះ ព្រោះនេះជាការបង្ហាញឱ្យឃើញពីការអភិវឌ្ឍគុណផលនៃការលេងរបស់កម្ពុជា ដ៏ពិតប្រាកដ សម្រាប់ត្រៀមឆ្ពោះទៅកាន់ការប្រកួតស៊ីហ្គេម ជាពិសេសស៊ីហ្គេម លើកទី៣២ ឆ្នាំ២០២៣ នៅកម្ពុជា។
យ៉ាងណាក៏ដោយ តាមរយៈការចាញ់ក្រុមជប៉ុន ៤-០ សម្រាប់ការប្រកួតលើកទី ២ ចុងក្រោយរបស់ខ្លួននេះ ក្រុមកម្ពុជា ហាក់មិនមានឱកាស បានឡើងទៅវគ្គបន្ត ក្នុងនាមជាក្រុមលេខ២ល្អនោះទេ ចំណែកក្រុមជប៉ុន ត្រូវបានគេមើលឃើញថា នឹងអាចបន្តទៅយកឈ្នះលើក្រុមហុងកុង នៅថ្ងៃទី២៨ ខែតុលា ដើម្បីឡើងទៅលេងនៅវគ្គបន្ត ក្នុងនាមជាក្រុមលេខ១ ប្រចាំពូល K នេះ ជាមិនខាន៕
