បរទេស៖ ខ្សែប្រយុទ្ធ Olivier Giroud បានស៊ុតបាល់បញ្ចូលទីគ្រាប់បាល់ឈ្នះ ក្នុងពេលក្រុម AC Milan បានផ្តួលក្រុម Torino ក្នុងលទ្ធផល ១-០ កាលពីថ្ងៃអង្គារ ដើម្បីជួយឲ្យក្រុមរបស់គេឡើងឈរលើកំពូលតារាងនៃក្របខ័ណ្ឌ Serie A បើទោះបីលេងមិនបាននៅកីឡដ្ឋាន San Siro ក៏ដោយ។
ខ្សែប្រយុទ្ធអន្តរជាតិបារាំង Giroud បានរកគ្រាប់បាល់ទី៤របស់គេក្នុងការប្រកួតលីក បើគិតចាប់តាំងពីផ្ទេរមកពីក្លិប Chelsea នៅនាទី ទី១៤ ក្នុងការប្រកួតជាមួយនឹងក្រុម Torino ដើម្បីជួយឲ្យ AC Milan នាំមុខ៣ពិន្ទុជាបណ្តោះអាសន្នលើកំពូលតារាង។ ប៉ុន្តែ Napoli អាចដណ្តើមយកចំណាត់ថ្នាក់លេខ១វិញ នៅរាត្រីថ្ងៃព្រហស្បតិ៍ ប្រសិនបើពួកគេយកឈ្នះលើក្រុម Bologna។
Giroud បានប្រាប់សារព័ត៌មាន DAZN ថា៖ «ខ្ញុំពិតជារីករាយណាស់ យើងធ្វើបានយ៉ាងល្អ ក្នុងការប្រកួតនេះ ហើយរារាំងមិនឲ្យ Torino បង្កើតឱកាសបានច្រើន។ យើងមាន៣ពិន្ទុ ដែលជារឿងដ៏សំខាន់បំផុត។ យើងលេងរាល់៣ថ្ងៃម្តង ហើយវាពិតជាពិបាកសម្រាប់រាងកាយ ហេតុនេះ អ្វីៗមិនល្អឥតខ្ចោះឡើយ ប៉ុន្តែ យើងពិតជារីករាយជាមួយនឹងជ័យជម្នះនៅរាត្រីនេះ»៕
ប្រភពព័ត៌មាន៖ Channel News Asia