បរទេស៖ Barcelona មានបំណងចង់ខ្ចីជើងខ្សែបម្រើ Donny van de Beek របស់ក្រុមបិសាចក្រហម Man. United នៅពេលទីផ្សារដោះដូរកីឡាករនិងបើកជាលើកទី២នៅខមករា២០២២ខាងមុខនេះ។ គួរបញ្ជាក់ថាកីឡាករវ័យ ២៤ ឆ្នាំរូបនេះនៅតែបន្តជាប់គាំងមិនអាចរកដំណោះស្រាយ សម្រាប់ឪកាសចូលលេង ក្រោមការដឹកនាំរបស់លោក Ole Gunnar Solskjaer ស្របពេលកីឡាករអន្តរជាតិហូឡង់រូបនេះបាន បង្កើនការចរចារចង់ចាកចេញពីទឹកដី Old Trafford តែម្តង។
Van de Beek ធ្លាប់ត្រូវបានជម្រុញការផ្លាស់ទៅកាន់ទឹកដី Real Madrid កាលពីពេលថ្មីៗកន្លងទៅនេះ។ទោះជាយ៉ាងណាប្រភពពីគេហទំព័រ Sport បានលើកឡើងថាក្លឹបយក្សកាតាឡាន់មានបំណងឆ្មក់ឪកាសចុះហត្ថលេខានាំយក Van de Beek ទៅកាន់ទឹកដីCamp Nou ជាមួយជម្រើសទិញផ្តាច់ជាអចន្រ្តៃយ៏ប្រសិនជាDe Beek អាចសម្របខ្លួននិងបង្ហាញសមត្ថភាពជួយក្រុមបានល្អ។
Barcelona សម្លឹងឃើញថាអតីតយុវជនថ្នាលក្លឹប Ajax ដែលចូលលេងបានត្រឹមតែ៦ នាទីប៉ុណ្ណោះនៅក្របខណ្ឌ Premier League រដូវកាលនេះនិងជួយពង្រឹងតំបន់ បម្រើកណ្តាល និង បង្កើនឪកាសរកគ្រាប់បាល់សម្រាប់ក្រុមបានល្អប្រសើរជាងពេលបច្ចុប្បន្ន។ផ្ទុយទៅវិញ Van De Beek កុងត្រារបស់ខ្លួនមានសុពលភាពជាមួយក្លឹបMan.Utdរហូតដល់ឆ្នាំ២០២៥ឯណោះ៕
ប្រភពព័ត៍មាន៖ Sportsmole