បរទេស៖ លោក Antonio Conte បានបញ្ជាក់ថា លោកប្តេជ្ញាចិត្តក្នុងការប្រែក្លាយ Tottenham ឲ្យទៅជាបេក្ខភាពប្រជែងដណ្តើមពាននានា ក្រោយពីត្រូវបានប្រកាសថា ជាអ្នកចាត់ការទូទៅថ្មីរបស់ក្លិបនេះ ក្នុងកិច្ចសន្យាដែលមានទំហំទឹកប្រាក់១៥លានផោនក្នុង១ឆ្នាំ រហូតដល់ឆ្នាំ២០២៣ ជាមួយនឹងជម្រើសក្នុងការបន្តកុងត្រាបន្ថែមទៀត។
គ្រូបង្វឹកសញ្ជាតិអ៊ីតាលីរូបនេះ ដែលបានឈ្នះពានក្របខ័ណ្ឌ Premier League ជាមួយនឹងក្លិប Chelsea ក្នុងឆ្នាំ២០១៧ ចូលជំនួសកន្លែងរបស់លោក Nuno Espírito Santo ដែលត្រូវបានបណ្តេញចេញកាលពីថ្ងៃចន្ទ។ លោក Daniel Levy ប្រធានក្លិប Spurs គិតថា លោកត្រូវតែចាត់វិធានការ ក្រោយពីការរងបរាជ័យក្នុងលទ្ធផល ៣-០ ក្រោមស្នាដៃក្រុម Manchester United ហើយលោកបានដាក់ការចាប់អារម្មណ៍ជាថ្មីលើលោក Conte ដែលលោកបានព្យាយាមនាំយកកាលពីខែមិថុនាក្នុងនាមជាគ្រូបង្វឹកជំនួសកន្លែងរបស់លោក José Mourinho។ ជាមួយគ្នានេះ លោក Levy បានផ្តល់ការធានាដល់លោក Conte ថា លោកនឹងគាំទ្រគ្រូបង្វឹករូបនេះ ទៅលើការនាំមុខកីឡាករដែលត្រឹមត្រូវ។
ប៉ុន្តែ ទោះបីជាយ៉ាងណា ការលក់កីឡាករចេញ នឹងនៅតែក្លាយជាចំណុចសំខាន់ ដើម្បីមានកញ្ចប់ថវិកាគ្រប់គ្រាន់។ លោក Conte ដែលបានឈ្នះពាន Serie A ជាមួយនឹងក្លិប Inter Milan កាលពីរដូវកាលមុននោះ បានឲ្យដឹងថា៖ «ខ្ញុំពិតជារីករាយណាស់ក្នុងការវិលទៅកាន់អាជីពជាគ្រូបង្វឹកវិញ និងដឹកនាំក្លិបមួយនៅ Premier League ដែលមានមហិច្ឆតាក្នុងការក្លាយជាក្រុមដ៏ខ្លាំមួយម្តងទៀត»៕
ប្រភពព័ត៌មាន៖ The Guardian