បរទេស៖ លោក Antonio Conte កាលពីថ្ងៃពុធ បានរិះគន់លើសកម្មភាពដោះដូរកីឡាកររបស់ក្រុម Tottenham កាលពីខែមករា តាមរយៈការនិយាយថា ក្រុមរបស់លោក «ត្រូវបានធ្វើឲ្យទន់ខ្សោយ»។
Spurs បានបញ្ជូនកីឡាករ Tanguy Ndombele ឲ្យវិលទៅកាន់ក្លិប Lyon វិញ ហើយ Giovani Lo Celso និង Bryan Gil បានផ្ទេរទៅកាន់ក្លិប Valencia និង Villarreal រៀងៗខ្លួន ស្របពេលដែល Jack Clarke ត្រូវបានខ្ចីជើងទៅកាន់ក្លិប Sunderland ហើយ Dele Alli បានផ្ទេរទៅកាន់ក្លិប Everton។ ស្របពេលជាមួយគ្នានេះ ពួកគេបាននាំយកកីឡាករ Rodrigo Bentancur និង Dejan Kulusevski ពីក្លិប Juventus ក្រោយពីកីឡាករទាំង២ មិនអាចបង្ហាញពីទម្រង់លេងដ៏ល្អក្នុងទីក្រុង Turin។
ក្នុងកិច្ចសម្ភាសមួយជាមួយនឹងទូរទស្សន៍ Sky Sport Italia លោក Conte បានឲ្យដឹងថា៖ «យើងមិនបានពង្រឹងក្រុមឡើយ ប៉ុន្តែ បែរជាយើងបានធ្វើឲ្យក្រុមទន់ខ្សោយទៅវិញ។ Bentancur និង Kulusevski គឺជាជម្រើសដ៏ល្អសម្រាប់ Tottenham ពីព្រោះ Tottenham កំពុងតែស្វែងរកកីឡាករវ័យក្មេងដែលពួកគេអាចអភិវឌ្ឍបាន និងរីកចម្រើន មិនមែនកីឡាករដែលត្រៀមខ្លួនរួចរាល់ហើយ។ នេះ គឺជាបញ្ហា។ នេះគឺជាទស្សនវិស័យ និងចិត្តវិទ្យារបស់ក្លិប»។ ក្រុម Tottenham បច្ចុប្បន្នកំពុងតែស្ថិតក្នុងចំណាត់ថ្នាក់លេខ៨ នៅលើតារាងក្របខ័ណ្ឌ Premier League ដោយមាន៧ពិន្ទុតាមពីក្រោយក្រុមស្ថិតក្នុងចំណាត់ថ្នាក់ដែលត្រូវឈ្នះកៅអីទៅលេងក្នុងក្របខ័ណ្ឌ Champions League៕
ប្រភពព័ត៌មាន៖ Channel News Asia