បរទេស៖ Barcelona ត្រៀមនិងតែងតាំងវីរបុរស និងជាអតីតខ្សែបម្រើប្រវត្តិសាស្រ្តក្លឹបលោក Xavi Hernandez ជាអ្នកចាត់ការថ្មីរបស់ក្លឹបនៅសប្តាហ៍ទី១នៃខែវិច្ឆិកានេះយោងគេហទំព័រ Dailymail បានចុះផ្សាយ។ក្រុមយក្សកាតាឡាន់ដែលទើបតែចែកផ្លូវគ្នាជាមួយ លោក Ronald Koeman កាលពីចុងខែខែតុលា ស្របពេលចាត់ការបណ្តោះអាសន្ន Sergi Barjuan ដែលដឹកនាំ ក្រុម ប្រកួតស្មើជាមួយ Alaves និងជ័យជំនះនៅក្របខណ្ឌ Champions League Dynamo Kiev កំពុងតែនៅទទួល បន្ទុកដឹកនាក្រុមនៅឡើយ។
Xavi គឺជាបេក្ខភាពដ៏ស័ក្តសមសម្រាប់បន្តតំណែងពីលោក Koeman នៅទឹកដី Camp Nou ទោះបីជាកាលពីពេលថ្មីៗនេះក្លឹបដែលXavi កំពុងដឹកនាំនៅលីគកំពូលប្រទេសអារ៉ាប់រួមគឺ Al-Sadd មានការខឹងសម្បារនឹងបានច្រោនចោលពត៌មានពីសំនាក់ក្លឹបBarcelona ដែលចង់បានគ្រូបង្វឹករបស់ពួកគេទៅដឹកនាំ យ៉ាងណាក្តី ។
ប្រភពខាងលើបន្ថែមថាគ្រូបង្វឹកបណ្តោះអាសន្ន Barjuan នឹgនៅតែបន្តដឹកនាំក្រុមពេលធ្វើដំណើរទៅធ្វើការប្រកួត ក្រប ខណ្ឌ La Liga នៅថ្ងៃសៅរ៍ជាមួយក្រុមម្ចាស់ផ្ទះ Celta Vigo មុនពេល Xavi ចូលកាន់តំណែងជាលើកដំបូងទល់នឹង Espanyol នៅថ្ងៃទី ១៨ ខែវិច្ឆិកា។ អតីតខ្សែបម្រើក្រុមជម្រើសជាតិអេស្បាញ Xavi មានប្រវត្តិដឹកនាំឈ្នះ ៦២ ប្រកួតក្នុងចំណោមការប្រកួតសរុប ៩០ ដងពេលដឹកនាំ Al-Sadd ហើយក៏ធ្លាប់បង្ហាញខ្លួនបាន៧៦៧ប្រកួតសម្រាប់ Barcelonaបន្ទាប់ពីចំណាយពេល ១៧ ឆ្នាំ៕
ប្រភពព័ត៍មាន៖ Sportsmole