បរទេស៖ ការប្រកួតក្របខ័ណ្ឌ Ligue 1 កាលពីថ្ងៃអាទិត្យរវាងក្រុម Lyon និង Marseille ត្រូវបានផ្អាកជិតរយៈពេល២ម៉ោង ក្រោយពីការប្រកួតនេះ ត្រូវបានរំខាន នៅពេលដែលខ្សែបម្រើប្រយុទ្ធ Dimitri Payet បានរងនូវការចោលដបទឹកសុទ្ធពីលើ ពីអ្នកគាំទ្រ ជាលើកទី២ នៅរដូវកាលនេះ។
Payet តម្រូវឲ្យមានការពិនិត្យព្យាបាលភ្លាមៗ ក្រោយពីបានរងនូវការចោលដបចំក្បាលរបស់គេ នៅពេលដែលរូបគេបានត្រៀមស៊ុតបាល់ជ្រុង នៅនាទី ទី៥ដែលនាំឲ្យក្រុមទាំង២ វិលទៅកាន់បន្ទប់ផ្លាស់ប្តូរសម្លៀកបំពាក់វិញ។ លោក Pablo Longoria ប្រធានក្លិប Marseille បានចាត់ទុកថា «វាជារាត្រីដ៏ខ្មៅងងឹតសម្រាប់កីឡាបាល់ទាត់»។ លោកបានឲ្យដឹងថា៖ «Dimitri រងប៉ះពាល់ផ្នែករាងកាយ ហើយវាមិនមែនជារឿងធម្មតាឡើយ។
យើងតែងតែថ្កោលទោសចំពោះប្រភេទនៃអំពើហិង្សាបែបនេះ ព្រោះវាជះឥទ្ធិពលអាក្រក់ដល់គ្រប់គ្នា។ គ្មាននរណាម្នាក់ដែលចូលចិត្តបាល់ទាត់ អាចរីករាយនៅយប់នេះឡើយ។ ផលប៉ះពាល់ គឺការប្រើអំពើហិង្សា ហើយរូបគេបានរងនូវផលប៉ះពាល់»៕
ប្រភពព័ត៌មាន៖ Channel News Asia