កីឡាករជើងចាស់ ប្រាក់ មន្នីឧត្តម របស់ក្រុមព្រះខ័នរាជស្វាយរៀង ត្រូវបានកោះហៅឱ្យចូលរួមជាមួយក្រុមជម្រើសជាតិកម្ពុជា ជាថ្មីឡើងវិញ បន្ទាប់ពីគ្មានឈ្មោះ សម្រាប់ការចេញទៅបំពេញបេសកកម្ម កាលពីពេលថ្មី កន្លងមកនេះ ប៉ុន្តែខ្សែប្រយុទ្ធរបស់បឹងកេត ម៉ាត់ នូរុណ នៅតែបន្តអនុវត្តមាន នៅក្នុងបញ្ជីឈ្មោះក្រុមជម្រើសជាតិ ដដែល។
យោងតាមបញ្ជីឈ្មោះក្រុមជម្រើសជាតិ ដែលចេញដោយសហព័ន្ធកីឡាបាល់ទាត់កម្ពុជា កាលពីព្រឹកថ្ងៃអង្គារនេះ បានបង្ហាញថា កីឡាករចំនួន៣០នាក់ មកពីក្លិបចំនួន៨ រួមមាន វិសាខា ភ្នំពេញក្រោន បឹងកេត ព្រះខ័នរាជស្វាយរៀង ណាហ្គាវើលដ៍ កងយោធពលខេមរភូមិន្ទ ខេត្តព្រៃវែង និងក្រុមអគ្គិសនីកម្ពុជា ត្រូវបានកោះហៅ ដើម្បីត្រៀមចូលរួមការប្រកួតពានរង្វាន់ AFF Suzuki Cup 2020 ដែលនឹងត្រូវធ្វើនៅប្រទេសសិង្ហបុរី ចាប់ពីថ្ងៃទី៥ ខែធ្នូ ឆ្នាំ២០២១ ដល់ថ្ងៃទី១ ខែមករា ឆ្នាំ២០២២។
កីឡាករជើងចាស់សម្បូរបទពិសោធមួយចំនួនដូចជា គួច សុកុម្ភៈ, សុះ ស៊ូហណា, កែវ សុខផេង, អ៊ន ចាន់ប៉ូលីន, សារ៉េត គ្រីយ៉ា, សឿយ វិសាល និងប្រាក់ មុន្នីឧត្តម ជាដើម សុទ្ធតែមានឈ្មោះ នៅក្នុងបញ្ជីឈ្មោះក្រុមជម្រើសជាតិ ទាំង៣០នាក់លើកនេះ ហើយប្រាក់ ធីវ៉ា ក៏ត្រូវបានកោះហៅឱ្យចូលរួមផងដែរ ប៉ុន្តែនៅក្នុងបញ្ជីឈ្មោះនេះ គ្មានវត្តមាន ម៉ាត់ នូរុណ នោះទេ ហើយ គួច ដានី ដែលធ្លាប់មានឈ្មោះ ក៏មិនមាននោះដែរ។
គួរបញ្ជាក់ថា សម្រាប់ការប្រកួតពានរង្វាន់ AFF Suzuki Cup 2020 ដែលបានលើកមកធ្វើនៅឆ្នាំ២០២១ និងដើមឆ្នាំ២០២២នេះ ក្រុមជម្រើសជាតិកម្ពុជា ឈរនៅពូលB ជាមួយក្រុមវៀតណាម ម៉ាឡេស៊ី ឥណ្ឌូនេស៊ី និងឡាវ ខណៈពូលA មានថៃ ក្រុមម្ចាស់ផ្ទះសិង្ហបុរី ហ្វីលីពីន មីយ៉ាន់ម៉ា និងទីម័រខាងកើត៕