បរទេស៖ លោក Thomas Tuchel បាននិយាយថា Chelsea បានបង្ហាញពីទម្រង់លេងក្នុងកម្រិតកំពូល ខណៈដែលក្រុមម្ចាស់ការពារជើងឯក Champions League មួយនេះ បានកក់កៅអីរបស់ពួកគេ ក្នុងវគ្គ១៦ក្រុមចុងក្រោយ តាមរយៈការលត់ក្រុម Juventus យ៉ាងចាស់ដៃក្នុងលទ្ធផល ៤-០ កាលពីថ្ងៃអង្គារ។
ក្រុមរបស់លោក Tuchel បានរកគ្រាប់បាល់នាំមុខមុន នៅពេលដែលការធ្វើឲ្យបាល់ប៉ះដៃរបស់កីឡាករ Antonio Rudiger បានគេចផុតពីការរងពីន័យ នៅមុនពេល Trevoh Chalobah រកគ្រាប់បាល់បើកឆាកនៅតង់ទី១ នាកីឡដ្ឋាន Stamford Bridge។ ក្រុមសេះបង្កង់ Juventus មិនអាចធ្វើការវាយបកវិញបានឡើយ ខណៈដែលកីឡាករ Reece James, Callum Hudson-Odoi និង Timo Werner សុទ្ធសឹងបានស៊ុតបាល់បញ្ចូលទី ដើម្បីជួយឲ្យក្រុម Chelsea ឡើងឈរលើកំពូលតារាងនៃពូល H។ Chelsea កំពុងឈរពីលើក្រុម Juventus ដោយសារតែគ្រាប់បាល់ស៊ុតបញ្ចូលទី ហើយនិងមានសុវត្ថិភាពក្នុងការបញ្ចប់ក្នុងចំណាត់ថ្នាក់លេខ១ ប្រសិនបើពួកគេដណ្តើមបានជ័យជម្នះលើទឹកដីក្រុម Zenit Saint Petersburg ក្នុងការប្រកួតចុងក្រោយក្នុងពូល របស់ពួកគេនៅថ្ងៃទី៨ ខែធ្នូ។
នេះគឺជាការបង្ហាញពីទម្រង់លេងដ៏រឹងមាំរបស់ Chelsea ដែលមិនស្គាល់ចាញ់សោះពីការប្រកួត១០លើកចុងក្រោយ ក្នុងរាល់យុទ្ធនាការទាំងអស់ បើគិតចាប់តាំងពីចាញ់ក្រុម Juventus ១-០ កាលពីខែកញ្ញា។ លោក Tuchel បានឲ្យដឹងថា៖ «វាជាការបង្ហាញពីទម្រង់លេងយ៉ាងល្អ។ យើងចង់រក្សាការអត់ធ្មត់ ប៉ុន្តែ ក៏មិនដេកលក់ផងដែរ ហេតុនេះ វាការប្រជែងមួយក្នុងការមានទាំង២ចំណុច»។ យើងធ្វើបានយ៉ាងល្អ ហើយគួរឲ្យសរសើរចំពោះទម្រង់លេងដ៏អស្ចារ្យ»៕
ប្រភពព័ត៌មាន៖ Channel News Asia