បរទេស៖ ក្រុមបិសាចក្រហម Manchester United បានកក់កៅអីរបស់ពួកគេក្នុងក្របខ័ណ្ឌ Champions League វគ្គ១៦ក្រុមចុងក្រោយ ខណៈដែលខ្សែប្រយុទ្ធ Cristiano Ronaldo បានស៊ុតបាល់បញ្ចូលទី១គ្រាប់ក្នុងពេលក្រុមខ្លួនបានយកឈ្នះលើក្រុម Villarreal ក្នុងលទ្ធផល ២-០ កាលពីថ្ងៃអង្គារ។
ក្រុមម្ចាស់ជើងឯកក្របខ័ណ្ឌអឹរ៉ុប៣សម័យកាល Man United បានឈានទៅកាន់ការប្រកួតទី១របស់ខ្លួន បើគិតចាប់តាំងពីការបណ្តេញលោក Ole Gunnar Solskjaer ចេញកាពីចុងសប្តាហ៍មុន ខណៈដែលត្រូវតែដណ្តើមឲ្យបានជ័យជម្នះដើម្បីសុវត្ថិភាពក្នុងការបញ្ចប់ក្នុងចំណាត់ថ្នាក់លេខ១ ក្នុងពូល F។ ប៉ុន្តែ ពួកគេបានស្ថិតក្រោមសម្ពាធដ៏ធំ ខណៈដែលការរងបរាជ័យនឹងធ្វើឲ្យជោគវាសនាចេញពីដៃរបស់គេ។ លោក Michael Carrick ដែលជាគ្រូបង្វឹកបណ្តោះអាសន្ន បានឲ្យដឹងថា៖ «វាមិនមែនជាលទ្ធផលសំខាន់សម្រាប់ខ្ញុំឡើយ។ វាជាលទ្ធផលដ៏សំខាន់សម្រាប់កីឡាករ និងក្លិបនេះ»។
គ្រាប់បាល់របស់ Ronaldo គឺជាគ្រាប់បាល់ទី៧៩៩ក្នុងអាជីពរបស់គេ និងជាគ្រាប់បាល់ទី១៤០ក្នុងក្របខ័ណ្ឌ Champions League។ ស្របពេលជាមួយគ្នានេះ ខ្សែប្រយុទ្ធ Robert Lewandowski បានស៊ុតបាល់ overhead kick បញ្ចូលទីយ៉ាងល្អ ខណៈដែល Bayern Munich បានយកឈ្នះ ២-១ លើទឹកដីក្រុម Dynamo Kiev បើទោះបីមានកីឡាករ៥នាក់ជាប់ចត្តាឡីស័កក៏ដោយ៕
ប្រភពព័ត៌មាន៖ Channel News Asia