បរទេស៖ គ្រូបង្វឹកក្រុមមាន់ខ្នាយមាស Tottenham លោក Antonio Conte មានការព្រួយបារម្ភថាសមាជិកក្រុមដ៏សំខាន់ គឺខ្សែការពារ Cristian Romero នឹងត្រូវអវត្តមានមិនអាចជួយក្រុមមួយរយៈពេលជាមួយនឹងរបួសភ្លៅធ្ងន់ធ្ងរ ។
កីឡាករអន្តរជាតិអាហ្សង់ទីនរូបនេះបានប៉ះទង្គិចរបួសខាងលើកំលុងពេលបង្ហាញខ្លួនជួយក្រុមជម្រើសជាតិវគ្គ ជម្រុះWorld Cup ជាមួយប្រទេសប្រេស៊ីល និងមិនមានវត្តមាននោះទេពេលTottenham ផ្តួល Leeds United កាលពីថ្ងៃអាទិត្យ។
ពត៌មានដំបូងឡើយគឺបានអះអាងថា Romero និង ប្រឈមមុខនឹងបញ្ហាមិនអាចចូលលេងបានរយៈពេល ៣ សប្តាហ៍។ ប៉ុន្តែឆ្លើយតបបញ្ហានេះគ្រូបង្វឹកសញ្ជាតិអ៊ីតាលី លោក Conte បានផ្តល់ព័ត៌មាន មុនការប្រកួត Europa Conference Leagueនៅថ្ងៃព្រហស្បត្ត៏ ជាមួយក្រុម NS Mura ថាៈ Cristian Romero នៅរង់ចាំការស្កេនមួយផ្សេងទៀតនិងរង់ចាំចម្លើយពីគ្រូពេទ្យ។ និយាយការពិត ខ្ញុំគិតថារបួសរបស់គាត់គឺធ្ងន់ធ្ងរដូច្នេះយើងត្រូវរង់ចាំ។ ខ្ញុំមិនដឹងថាត្រូវប្រើពេលច្រើនប៉ុណ្ណានោះទេដើម្បីព្យាបាលអោយជាសះស្បើយទេ។ ប្រាកដណាស់របួសរបស់គាត់គឺធ្ងន់ធ្ងរជាង Giovani Lo Celso ឬ Dane Scarlett ទៅទៀត។ Lo Celso ត្រូវបានគេរំពឹងថានឹងអវត្តមានម្តងទៀតក្នុងសប្តាហ៍នេះ ខណៈដែល Scarlett បានរងរបួសកជើងអំឡុងពេលសម្រាកអន្តរជាតិដូចគ្នា៕
ប្រភពព័ត៍មាន៖ Sportsmole
