បរទេស៖ ក្រុម Tottenham បានរងនូវការផ្ទុះការឆ្លងវីរុសកូរ៉ូណាជាថ្មី នៅមុនពេលការប្រកួតពាន League Cup វគ្គពាក់កណ្តាលផ្តាច់ព្រ័ត្រ ជើងទី១ របស់ពួកគេនៅលើទឹកដីក្រុម Chelsea នៅរាត្រីថ្ងៃពុធ។
Spurs បានជួបវិបត្តិឆ្លងកូវីដ ១៩ រួចជាស្រេច ដោយកីឡាករ៩ពីក្រុមជម្រើសដំបូងរបស់ពួកគេ បានឆ្លងវីរុសនេះ កាលពីខែធ្នូ និងស្នើសុំផ្អាកការប្រកួតចំនួន៣លើក ប៉ុន្តែ លោកគ្រូបង្វឹក Antonio Conte បាននិយាយកាលពីថ្ងៃចន្ទថា មានករណីឆ្លងថ្មីផ្សេងទៀតនៅក្នុងក្រុមរបស់លោក។ ក្លិប Spurs កំពុងតែរង់ចាំលទ្ធផលពីការធ្វើតេស្តដោយម៉ាស៊ីន PCR ស្របពេលដែលោក Conte ក៏សង្ឃឹមថា នឹងមិនមានករណីឆ្លងថ្មីបន្ថែមទៀតឡើយនៅថ្ងៃអង្គារនេះ នៅមុនពេលពួកគេធ្វើដំណើរទៅប្រកួតជាមួយនឹងក្រុមម្ចាស់ជើងឯកប្រចាំទ្វីបអឺរ៉ុប។
លោក Conte បាននិយាយក្នុងសន្និសីទសារព័ត៌មានមួយថា៖ «យើងកំពុងតែពិនិត្យស្ថានភាពអំពីកូវីដ។ យើងកំពុងតែរស់នៅជាមួយនឹងស្ថានភាពនេះ មិនមែនមានតែ Tottenham ឡើយ ប៉ុន្តែ ក្លិបទាំងអស់។ យើងត្រូវតែត្រៀមខ្លួនឲ្យបានរួចរាល់ដើម្បីស្វែងរកដំណោះស្រាយដ៏ត្រឹមត្រូវ និងជាដំណោះស្រាយដ៏ល្អបំផុតសម្រាប់ក្រុមនេះ»៕
ប្រភពព័ត៌មាន៖ Channel News Asia