បរទេស៖ យុទ្ធនាការនៅអឺរ៉ុបរបស់ក្លិប Tottenham Hotspur នៅរដូវកាលនេះ គឺបញ្ចប់ហើយ ក្រោយពីសហព័ន្ធកីឡាបាល់ទាត់ទ្វីបអឺរ៉ុបហៅកាត់ថា UEFA បានផ្តល់ជ័យជម្នះឲ្យក្រុម Rennes ក្នុងលទ្ធផល ៣-០ ក្នុងការប្រកួតចុងក្រោយក្នុងពូលនៃក្របខ័ណ្ឌ Europa Conference League របស់ពួកគេកាលពីថ្ងៃចន្ទ។
Spurs មិនអាចបំពេញកម្មវិធីប្រកួតរបស់ខ្លួននៅថ្ងៃទី៩ ខែធ្នូ ឡើយ ដោយសារតែការផ្ទុះការឆ្លងកូវីដ ១៩ ក្នុងក្រុមនេះ។ ជាលទ្ធផល ពួកគេត្រូវបញ្ចប់ក្នុងចំណាត់ថ្នាក់លេខ៣ក្នុងពូល បន្ទាប់ពីក្រុមលេខ១ Rennes ដែលឈានទៅវគ្គ១៦ក្រុមចុងក្រោយដោយស្វ័យប្រវត្តិ និងក្រុមហូឡង់ Vitesse ដែលបច្ចុប្បន្នត្រូវប៉ះក្រុម Rapid Vienna ក្នុងវគ្គ playoff។
UEFA បានឲ្យដឹងក្នុងសេចក្តីថ្លែងកាណ៍មួយថា៖ «ក្រុមប្រឹក្សាជាន់ខ្ពស់របស់ UEFA បានធ្វើការសម្រេចចិត្តដូចតទៅនេះ ដើម្បីប្រកាសថា ការប្រកួតក្របខ័ណ្ឌ UEFA Europa Conference League វគ្គចែកពូល ក្នុងរដូវកាលឆ្នាំ២០២១-២០២២ រវាងក្រុម Tottenham Hotspur FC និង Stade Rennais FC ដែលដំបូងឡើយត្រូវបានគ្រោងរៀបចំឡើងនៅថ្ងៃទី៩ ខែធ្នូ ឆ្នាំ២០២១ ត្រូវបានបោះបង់ដោយក្លិប Tottenham Hotspur FC ហេតុនេះ ត្រូវចាត់ទុកថា ចាញ់ការប្រកួតក្នុងលទ្ធផល ៣-០»៕
ប្រភពព័ត៌មាន៖ Channel News Asia