បរទេស៖ ខ្សែប្រយុទ្ធ Neymar ត្រូវបានរំពឹងទុកថា នឹងត្រូវអវត្តមានចន្លោះពី៦ ទៅ៨សប្តាហ៍ ក្រោយពីបានរងរបួសដាច់សរសៃចងកជើងឆ្វេងរបស់គេ។ នេះបើយោងទៅតាមការបញ្ជាក់របស់ក្លិប Paris Saint-Germain កាលពីថ្ងៃចន្ទ។
តារាឆ្នើមអន្តរជាតិប្រេស៊ីលរូបនេះ បានបង្ហូរទឹកភ្នែក ពេលត្រូវបានគេសែងចេញពីទីលានប្រកួត ក្រោយពីបានរងរបួស នៅនាទីចុងក្រោយក្នុងពេលក្រុមរបស់ខ្លួនបានយកឈ្នះលើក្រុម Saint-Etienne ក្នុងលទ្ធផល ៣-១។ មុននឹងបន្ថែមថា ព័ត៌មានបន្ថែមទៀតនឹងត្រូវប្រកាសក្នុងរយៈពេល៧២ម៉ោងនោះ ក្លិប PSG បានឲ្យដឹងក្នុងសេចក្តីថ្លែងការណ៍ថា៖ «ការត្រួតពិនិត្យដែលត្រូវបានធ្វើឡើងកាលពីយប់មិញ បង្ហាញថា Neymar Jr កំពុងតែមានបញ្ហរបួសកងជើងឆ្វេង ដោយសារតែការដាច់សរសៃចង»។
Neymar បានចូលលេង១៣លើកក្នុងចំណោមការប្រកួត១៥លើកចុងក្រោយសម្រាប់ PSG នៅរដូវកាលនេះ ក្រោយពីចំណាយពេលអស់៤ឆ្នាំនៅប្រទេសបារាំង ប៉ុន្តែរូបគេនឹងប្រឈមមុខនឹងការអវត្តមានរយៈពេលវេង ក្រោយពីបានដួលទាំងជំហ ដោយសារតែការព្យាយាមជែងដណ្តើមបាល់របស់កីឡាករ Yvann Macon។ ខ្សែប្រយុទ្ធវ័យ២៩ឆ្នាំរូបនេះ បានបង្ហាញវីដេអូមួយកាលពីថ្ងៃចន្ទ ដើម្បីបង្ហាញថា ជើងឆ្វេងរបស់គេកំពុងតែទទួលការព្យាបាល៕
ប្រភពព័ត៌មាន៖ Channel News Asia
