បរទេស៖ បញ្ហានៅក្រៅទីលានរបស់ក្លិប Bayern Munich ជុំវិញភាពជ្រួលច្របល់នៃមហាសន្និបាតប្រចាំឆ្នាំ និងការពិភាក្សាលើការចាក់វ៉ាក់សាំង ស្របពេលដែលកីឡាករជាច្រើនកំពុងស្ថិតក្នុងចត្តាឡីស័ក អាចធ្វើឲ្យក្រុម Borussia Dortmund មានប្រៀបក្នុងជំនួបក្របខ័ណ្ឌ Bundesliga នៅចងសប្តាហ៍នេះ។ នេះបើយោងទៅតាមការលើកឡើងរបស់អតីតប្រធានក្រុមនៃក្រុមជម្រើសជាតិអាល្លឺម៉ង់លោក Lothar Matthaeus កាលពីថ្ងៃព្រហស្បតិ៍។
សមាជិកជាច្រើនរបស់ក្លិប Bayern កាលពីសប្តាហ៍មុន បានធ្វើការតវ៉ានៅ AGM ប្រឆាំងនឹងកិច្ចព្រមព្រៀងធ្វើជាម្ចាស់ឧបត្ថម្ភរបស់ក្រុមហ៊ុនអាកាសចរណ៍ Qatar Airways ជុំវិញកំណត់ត្រានៃការរំលោភសិទ្ធិមនុស្សរបស់ប្រទេសអាស៊ីកណ្តាលមួយនេះ ស្របពេលដែលកីឡាករចំនួន៦នាក់ បានស្ថិតក្នុងចត្តាឡីស័ក ទាក់ទងនឹងវីរុសកូវីដ ១៩។ កីឡាករភាគច្រើនដែលជាប់ចត្តាឡីស័ក បានវិលទៅកាន់ក្រុមនេះវិញ ប៉ុន្តែខ្សែបម្រើ Joshua Kimmich នឹងអវត្តមានក្នុងការប្រកួតនៅរាត្រីថ្ងៃសៅរ៍ ដោយសារតែជាប់ធ្វើចត្តាឡីស័ក ក្រោយពីតេស្តឃើញលទ្ធផលវិជ្ជមានវីរុសកូវីដ ១៩។
ខ្សែបម្រើអន្តរជាតិអាល្លឺម៉ង់ Kimmich ដែលមិនបានចាក់វ៉ាក់សាំង បានស្ថិតចំចំណុចកណ្តាលនៃការពិភាក្សាលើការចាក់វ៉ាក់សាំងកីឡាករ ក្នុងក្របខ័ណ្ឌ Bundesliga។ លោក Matthaeus សមាជិកក្រុមជម្រើសជាតិអាល្លឺម៉ង់ ដែលបានឈ្នះពាន World Cup ឆ្នាំ១៩៩០ បានឲ្យដឹងថា៖ «Bayern មានបញ្ហាជាច្រើន ពួកគេអវត្តមាន Kimmich ហើយមានកិច្ចពិភាក្សាជាច្រើនជុំវិញក្រុមនេះ ហើយប្រហែលជាពួកគេមិនមានការផ្តោតអារម្មណ៍ដូចពីមុនឡើយ»៕
ប្រភពព័ត៌មាន៖ Channel News Asia
