ក្រុមម្ចាស់ផ្ទះសិង្ហបុរី និងក្រុមជម្រើសជាតិថៃ សុទ្ធតែទទួលបានជ័យជម្នះ នៅក្នុងការប្រកួតបើកឆាក ប្រចាំពូលA នៃពានរង្វាន់ AFF Suzuki Cup 2020 កាលពីថ្ងៃអាទិត្យ ចំណែកក្រុមជម្រើសជាតិកម្ពុជា នឹងត្រូវប្រកួតបើកឆាកប្រចាំពូល B ជាមួយក្រុមជម្រើសជាតិម៉ាឡេស៊ី នារសៀលម៉ោង ៤:៣០ ថ្ងៃចន្ទនេះ គឺមុនពេលក្រុមឡាវ ត្រូវប្រឈមជាមួយក្រុមជើងឯក វៀតណាម ហើយការប្រកួតនេះ មានការផ្សាយបន្តផ្ទាល់ តាមកញ្ចក់ទូរទស្សន៍ហង្សមាស។
បើទោះបីជា ក្រុមធំជម្រើសជាតិកម្ពុជា មិនធ្លាប់មានប្រវត្តិឈ្នះក្រុមម៉ាឡេស៊ី នៅក្នុងការប្រកួតពានរង្វាន់ AFF Suzuki Cup នេះ ហើយពួកគេ ប្រមូលផ្តុំហ្វឹកហាត់ ជុំគ្នាបានរយៈពេលខ្លី ហើយថែមទាំង មិនបានប្រកួតមិត្តភាពដកស្រង់បច្ចេកទេស ប៉ុន្តែគ្រូបង្គោលលោក Ryu Hiros នៅតែមានការរំពឹងថា កូនក្រុមរបស់លោក នឹងលេងបានល្អ ពេលជួប ម៉ាឡេស៊ី លើកនេះ។
គ្រូបង្វឹកជនជាតិជប៉ុន លោក Ryu Hiros បាននិយាយ នៅក្នុងសន្និសីទកាសែត កាលពីថ្ងៃសៅរ៍ថា៖ «យើងបានជួបប្រទះការលំបាកជាច្រើន នៅក្នុងអំឡុងពេលមានជំងឺរាតត្បាត ដោយក្រុមនេះ មិនមានការប្រកួតមិត្តភាពទេ ប៉ុន្តែយើងរំពឹងថា កីឡាករទាំងយុវជន និងកីឡាករ ដែលមានបទពិសោធច្រើន ពីការប្រកួតអន្តរជាតិ នឹងបង្ហាញការលេងល្អ និងភាពស៊ីចង្វាក់គ្នាបានល្អ សម្រាប់ការប្រកួតនេះ»។
យោងតាមប្រវត្តិ និងកំណត់ត្រា នៃការជួបគ្នារវាងក្រុមជម្រើសជាតិកម្ពុជា និងម៉ាឡេស៊ី នៅក្នុងពានរង្វាន់ AFF Suzuki Cup នេះ ដែលចេញដោយ សហព័ន្ធកីឡាបាល់ទាត់កម្ពុជា តាំងពីឆ្នាំ ១៩៩៦ មក បានបង្ហាញថា កម្ពុជា មិនធ្លាប់ឈ្នះក្រុមម៉ាឡេស៊ី នោះទេ គឺពួកគេ បានចាញ់ សម្រាប់ការប្រកួតទាំង៣លើក គឺបានចាញ់ ៣-០ កាលពីឆ្នាំ ២០០០ រួចបន្តចាញ់ ៣-២ កាលឆ្នាំ ២០១៦ ហើយការជួបគ្នាលើកចុងក្រោយ ក្នុងពាននេះ កាលឆ្នាំ ២០១៨ កម្ពុជា បានបន្តចាញ់ ១-០។
យ៉ាងណាក៏ដោយ គ្រូបង្គោលក្រុមម៉ាឡេស៊ី លោក Tan Cheng Hoe បានប្រាប់កាសែត New Straits Times នៅមុនពេល ការធ្វើដំណើរមកដល់ប្រទេសសិង្ហបុរីនេះ ថា៖ «ការជួបកម្ពុជា មិនងាយស្រួលដូចអ្នកគាំទ្រគិតនោះទេ ព្រោះពួកគេលេងបានល្អណាស់ ក្រោមការដឹកនាំរបស់ គ្រូបង្វឹកជនជាតិជប៉ុន។ បាល់ទាត់កម្ពុជា កំពុងរីកចម្រើននាពេលថ្មីៗនេះ ហើយ ចាន់ វឌ្ឍនាកា ក៏ជាប់ឈ្មោះឡើងមកដែរ ដែលយើងត្រូវតែយកចិត្តទុកដាក់។ ខ្ញុំមិនចង់ឱ្យកីឡាករ មានទំនុកចិត្តខ្លាំងពេកនោះទេ ក្នុងការប្រកួតបើកឆាកនោះទេ គឺពួកគេត្រូវតែផ្តោតលើការលេងតាមការណែនាំ»។
តែទោះបីជាយ៉ាងណា នៅក្នុងសន្និសិទកាសែតរួមគ្នារវាងក្រុមទាំង៤ ដែលឈរនៅពូលB កាលពីថ្ងៃសៅរ៍ កន្លងមកនេះ លោក Tan Cheng Hoe បានលាក់បាំងនៅក្តីបារម្ភនេះ ដោយប្តូរមកជានិយាយថា ក្រុមរបស់លោក នឹងដណ្តើមបានលទ្ធផលល្អ ពីការប្រកួតនេះ ដើម្បីឱ្យស័ក្តិសមទៅនឹងទំនុកចិត្តរបស់អ្នកគាំទ្រ ដែលមានចំពោះក្រុមនេះ។
លោក Tan Cheng Hoe បាននិយាយថា៖ «អ្នកគាំទ្រ ម៉ាឡេស៊ី ជាច្រើនមានការរំពឹងទុកខ្ពស់ ពីពួកយើង ដូច្នេះសង្ឃឹមថា អ្នកនឹងរីករាយជាមួយការប្រកួតនេះ ជាមួយក្រុមម៉ាឡេស៊ី។ យើងបានប្រមូលផ្តុំ នៅគូឡាឡាំពួមួយរយៈ ហើយក៏មានបញ្ហាខ្លះដែរ ប៉ុន្តែក្រុមទាំងមូល នឹងរក្សាការផ្តោតអារម្មណ៍ និងសុទិដ្ឋិនិយម ក្នុងគ្រប់កាលៈទេសៈទាំងអស់ ហើយព្យាយាមរក្សាលំនឹងក្រុមឱ្យល្អ សម្រាប់ការប្រកួតបើកឆាកនឹងកម្ពុជា»។
ដោយឡែកក្រុមការពារតំណែងជើងឯក វៀតណាម ក៏បានបង្ហាញកង្វល់ផងដែរ សម្រាប់ការប្រកួតនេះ។ គ្រូបង្គោល លោក Park Hang-seo ដែលត្រូវដឹកនាំក្រុមវៀតណាម ជួបក្រុមឡាវ នៅល្ងាចនេះ បាននិយាយថា៖«យើងទើបតែបានលេង៦ប្រកួត ក្នុងការប្រកួតជម្រុះជុំទី៣ នៃពាន World Cup ដោយយើងរកពិន្ទុមិនបានសោះ ហើយបញ្ហានេះ ក៏បានប៉ះពាល់ដល់បរិយាកាសនៃក្រុមទាំងមូល ផងដែរ។ ក្រៅពីនេះ យើងក៏ជាក្រុមការពារតំណែងជើងឯកនៃការប្រកួតនេះដែរ វាជាសម្ពាធ ដែលយើងមិនអាចនិយាយលទ្ធផលជាមុនបានទេ ប៉ុន្តែក្រុមវៀតណាមនឹងរៀបចំឱ្យបានល្អ»។
ដោយឡែក សម្រាប់ការប្រកួតបើកឆាកប្រចាំពូលA កាលពីថ្ងៃអាទិត្យ ម្សិលមិញ ក្រុមម្ចាស់ផ្ទះ សិង្ហបុរី បានឡើងទៅឈរនៅលេខ១ ប្រចាំពូលនេះ ជាបណ្តោះអាសន្ន បន្ទាប់ពីពួកគេ បានយកឈ្នះក្រុមមីយ៉ាន់ម៉ា ៣-០ ហើយក្រុមថៃ បានយក ឈ្នះក្រុមទីម័រខាងកើត ២-០ ដើម្បីឈរនៅលេខ២៕