ក្រុមជម្រើសជាតិកម្ពុជា នៅតែមិនអាចកែប្រែកំណត់ត្រាចាញ់ ក្រុមម៉ាឡេស៊ី បន្ទាប់ពីពួកគេ បានបន្តចាញ់ ម៉ាឡេស៊ី នៅក្នុងការប្រកួតបើកឆាក ប្រចាំពូលB នៃពានរង្វាន់ AFF Suzuki Cup 2020 កាលពីយប់ថ្ងៃចន្ទ ម្សិលមិញ ចំណែកក្រុមឡាវ ក៏បានចាញ់ក្រុមវៀតណាម ផងដែរ។
សម្រាប់ការប្រកួតនៅ ពហុកីឡដក្ឋាន Bishan Stadium ប្រទេសសិង្ហបុរី កាលពីថ្ងៃចន្ទនោះ ក្រុមកម្ពុជា បានដាក់សុទ្ធតែកីឡាករស្ថិតក្នុងជម្រើសល្អៗ ហើយពួកគេ ក៏បានបង្ហាញការប្រកួតប្រជែងយ៉ាងជាមួយក្រុមម៉ាឡេស៊ី នៅដើមតង់ទី១ ផងដែរ ប៉ុន្តែអ្វីៗបានប្រែប្រួល នៅពេលខ្សែការពារ កែន ច័ន្ទសុភ័ក្រ្ត បានបង្កើតកំហុស នៅមុខទីខ្លួនឯង ជាហេតុនាំឱ្យអាជ្ញាកណ្តាលផ្តល់បាល់ពិន័យ១១ម៉ែត្រ ទៅឱ្យក្រុមម៉ាឡេស៊ី នោះ។
ជាមួយគ្រាប់បាល់នាំមុខ ១-០ ដែលស៊ុតបាល់បានសម្រេចដោយកីឡាករ Safawi នៅនាទីទី២៣នេះ បានដាក់សម្ពាធទៅដល់ក្រុមកម្ពុជា ដោយពួកគេ ត្រូវបង្កើនការវាយលុក ដើម្បីរកបានគ្រាប់បាល់មកវិញ ប៉ុន្តែការព្យាយាមវាយបកលឿនៗ ប្រកបដោយភាពច្បាស់លាស់របស់ ម៉ាឡេស៊ី បានផ្តល់ឱកាសឱ្យ ខ្សែប្រយុទ្ធ Akhyar និង Kogileswaran រកបានម្នាក់១គ្រាប់ទៀតឱ្យក្រុមម៉ាឡេស៊ី នៅនាទីទី៦១ និងនាទីទី៧៨។
ជាមួយការនាំមុខ ៣-០ ត្រឹមនាទីទី៧៨នេះ ក្រុមម៉ាឡេស៊ី បានសម្រេចដាក់កីឡាករជម្រើសទី២របស់ខ្លួនឱ្យចូលលេងចំនួន៣នាក់ ព្រោះពួកគេគិតថា លទ្ធផលនេះ វាគ្រាប់គ្រាន់ នឹងជួយឱ្យពួកគេ ទទួលបាន៣ពិន្ទុរួចទៅហើយ។
យ៉ាងណាក៏ដោយ ការបង្កើតកំហុសរបស់អ្នកចាំទីក្រុមម៉ាឡេស៊ី ដែលបានបង្ហាញចេតនាលោតបុកជង្គង់ទៅលើខ្សែប្រយុទ្ធ សេត រ៉ស៊ីប ដែលប្តូរឱ្យចូលលេង នៅចុងតង់ទី២នោះ នាំឱ្យអាជ្ញាកណ្តាលពិន័យកាតលឿង និងផ្តល់បាល់១១ម៉ែត្រឱ្យកម្ពុជា ហើយ រ៉ស៊ីប ជាអ្នកសុទ្ធបាល់នេះបានសម្រេច នៅនាទីទី៩០។
ការរកបាន១គ្រាប់នេះ ទោះបីជាមិនអាចជួយឱ្យកម្ពុជា អាចកែប្រែកំណត់ត្រាចាញ់ ម៉ាឡេស៊ី ប៉ុន្តែវាក៏បានផ្តល់ជាការលើកទឹកចិត្តដល់អ្នកគាំទ្រ រាប់ម៉ឺននាក់ ដែលតស៊ូតាមដានការប្រកួតនេះ តាមរយៈការផ្សាយផ្ទាល់តាំងពីចាប់ផ្តើម រហូតដល់ចប់ការប្រកួត ផងដែរ គឺវាប្រសើរជាង ការរកមិនបាន១គ្រាប់សោះ។
១គ្រាប់របស់ សេត រ៉ស៊ីប នេះក៏បានជួយឱ្យកម្ពុជា គេចផុតពីប្រវត្តិជ្រាំដែល ពេលកម្ពុជា បានចាញ់ក្រុមម៉ាឡេស៊ី ៣-០ សម្រាប់ការប្រកួតពានរង្វាន់ AFF Suzuki Cup នេះ កាលពីឆ្នាំ ២០០០ ផងដែរ ខណៈការជួបគ្នា កាលពីឆ្នាំ២០១៦ កម្ពុជា បានចាញ់ ៣-២ ហើយការជួបគ្នា កាលឆ្នាំ ២០១៨ កម្ពុជា បានបន្តចាញ់ ១-០។ ជារួមក្រុមធំជម្រើសជាតិកម្ពុជា បានចាញ់ក្រុមម៉ាឡេស៊ី ទាំងការប្រកួតទាំងអស់ ក្នុងពាន AFF Suzuki Cup នេះ។
សម្រាប់ការប្រកួត កាលពីថ្ងៃយបើថ្ងៃចន្ទនោះដែរ ក្រុមការពារតំណែងជើងឯក វៀតណាម បានយកឈ្នះក្រុមឡាវ ២-០ ហើយគ្រាប់បាល់ជ័យជម្នះដែលរកបានដោយកីឡាករ Nguyễn Công Phượng នៅនាទីទី២៦ និង Phan Văn Đức នៅនាទីទី ៥៥ នេះ បានជួយឱ្យ ក្រុមវៀតណាម ឈរនៅលេខ២ប្រចាំពូលB នេះ បន្ទាប់ពីក្រុមម៉ាឡេស៊ី ដោយក្រុមទាំង២នេះ មាន៣ពិន្ទុដូចគ្នា៕