បរទេស៖ ខ្សែបម្រើ Mateo Kovacic របស់ Chelsea បានតេស្តឃើញជាវិជ្ជមានទៅលើវីរុសកូវីដ ១៩ ត្រឹមតែ១ថ្ងៃ ក្រោយពីវិលទៅហ្វឹកហាត់វិញ។ នេះបើយោងទៅតាមការប្រកាសរបស់លោកគ្រូបង្វឹក Thomas Tuchel កាលពីថ្ងៃអង្គារ។ កីឡាករវ័យ២៧ឆ្នាំរូបនេះ បានអវត្តមានចាប់តាំងពីចុងខែតុលា ហើយលោក Tuchel ធ្លាប់បានសង្ឃឹមថា នឹងដាក់ឲ្យរូបគេចូលលេងនៅសប្តាហ៍នេះ។
ខ្សែបម្រើដ៏មានឥទ្ធិពល N’Golo Kante នៅតែអវត្តមាន ដោយសារតែបញ្ហាជង្គង់ ស្របពេលដែល Jorginho ត្រូវបានបង្ខំចិត្តដាក់ឲ្យចូលលេង បើទោះបីមានបញ្ហាឆ្អឹងខ្នងក៏ដោយ ហើយនិងត្រូវអវត្តមានក្នុងការប្រកួតក្របខ័ណ្ឌ Champions League នៅលើទឹកដីក្រុម Zenit Saint Petersburg ដែលធ្វើឲ្យលោក Tuchel ត្រូវខ្វះខ្សែបម្រើការពារ។ លោក Tuchel បានឲ្យដឹងថា៖ «យើងមានព័ត៌មានមិនល្អ ដោយសារតែ Mateo បានហ្វឹកហាត់កាលពីម្សិលមិញ យ៉ាងរីករាយ ហើយវាគឺជារឿងដ៏គួរឲ្យរីករាយមួយ ប្រសិនបើរូបគេត្រឡប់មកវិញ»។
ក្រុមម្ចាស់ការពារជើងឯកមួយនេះ បានឈ្នះកៅអីទៅវគ្គបន្តរួចជាស្រេច ក្នុងក្របខ័ណ្ឌ Champions League ហើយនិងដណ្តើមចំណាត់ថ្នាក់លេខ១ក្នុងពូល H ប្រសិនបើពួកគេរកបានលទ្ធផលស្មើ ឬល្អប្រសើរជាងលទ្ធផលរបស់ក្រុម Juventus ពេលប្រកួតជាមួយនឹងក្រុម Malmo នៅរាត្រីនេះ៕
ប្រភពព័ត៌មាន៖ Channel News Asia
