បរទេស៖ អ្នកចាត់ការបណ្ដោះអាសន្នក្រុមបិសាចក្រហម Man Utd លោក Ralf Rangnick បានបង្ហើបប្រាប់ថាខ្សែប្រយុទ្ធ Anthony Martial បច្ចុប្បន្នមិនទាន់អាចដាក់អោយចូលលេងបបាននោះទេបើទោះបីជាក្នុងនាមកីឡាករបម្រុង ក៏ដោយ ហើយអ្វីដែលជាមូលហេតុនោះគឺរូបគេមានបញ្ហារបួសជង្គង់។
កីឡាករអន្តរជាតិបារាំងរូបនេះមិនមានវត្តមានក្នុងក្រុមសម្រាប់ការប្រកួត Premier League កាលពីថ្ងៃអាទិត្យជាមួយក្រុម Crystal Palace ក្រោយរងរបួសក្នុងការហ្វឹកហាត់កាលពីថ្ងៃសៅរ៍សប្តាហ៏មុន។ គ្រូបង្វឹកសញ្ជាតិអាឡឺម៉ង់រូបនេះក៏បានបញ្ជាក់ផងដែរថា Martial ក៏នឹងអវត្តមានក្នុងជំនួបជាមួយក្រុម Young Boys នៅក្របខ័ណ្ឌ Champions League នាថ្ងៃពុធនេះផងដែរ។ អតីតគ្រូបង្វឹកRBLeipzigបានបញ្ជាក់ប្រាប់យ៉ាងដូច្នេះថា «កីឡាករវ័យ២៦ឆ្នាំរូបនេះបានហ្វឹកហាត់កាលពីថ្ងៃសៅរ៍ និងកន្លះម៉ោងក្រោយមករូបគេមានបញ្ហា ឈឺជង្គង់ ។ យើងបានជួបជាមួយក្រុមគ្រូពេទ្យ និងបានយល់ព្រមថារូបគេគួរតែបន្តការព្យាបាលអោយបានជាសះស្បើយជាមុនសិន។ យើងត្រូវធ្វើឱ្យប្រាកដថាគាត់កាត់បន្ថយការឈឺចាប់ក្នុងរយៈពេលពីរបីថ្ងៃខាងមុខ ហើយសង្ឃឹមថាគាត់នឹងអាចហ្វឹកហាត់ឡើងវិញនៅសប្តាហ៍ក្រោយ»។
Martial មិនសូវជាកាក់កបក្នុងអាជីពអាចនិយាយបានថាមិនបានជាប់ជម្រើស១១នាក់ដំបូងជាមួយក្រុម ជើងឯកអង់គ្លេស ២០ សម័យសម្រាប់រដូវកាលនេះដោយរកបានតែ១ គ្រាប់ប៉ុណ្ណោះក្នុងការបង្ហាញខ្លួន គ្រប់ក្របខណ្ឌប្រកួត១០ដងកន្លងមក៕
ប្រភពព័ត៍មាន៖ Sportsmole