ក្រុមជម្រើសជាតិកម្ពុជា ដែលទើបជួបការខកចិត្ត ចំពោះការចាញ់ក្រុមម៉ាឡេស៊ី រហូតដល់ ៣–១ កាលពីថ្ងៃចន្ទនោះ នឹងត្រូវប្រឈមការប្រកួតកាន់តែតានតឹង ខណៈពួកគេ ត្រូវប្រកួតលើកទី២ ប្រចាំពូលB នៃពានរង្វាន់ AFF Suzuki Cup 2020 ជាមួយក្រុមជម្រើសជាតិឥណ្ឌូនេស៊ី នៅយប់ម៉ោង ៧:៣០ ថ្ងៃព្រហស្បតិ៍នេះ។
បើទោះបីជា ក្រុមជម្រើសជាតិឥណ្ឌូនេស៊ី បានខកខានចូលរួមការប្រកួតពានរង្វាន់ AFF Suzuki Cup នេះ ច្រើនឆ្នាំ ប៉ុន្តែតាមប្រវត្តិសាវតារនៃការជួបគ្នារហូតដល់១៦ គ្រប់ព្រឹត្តិការណ៍រវាងក្រុមទាំង២ តាំងពីឆ្នាំ១៩៩៥ រហូតដល់ឆ្នាំ២០១៧ គឺកម្ពុជា ធ្លាប់ស្មើ ១-១ ជាមួយក្រុមឥណ្ឌូនេស៊ី តែម្តងគត់ ចំណែកជំនួប១៥ដងផ្សេងទៀត គឺកម្ពុជា បានចាញ់ទាំងអស់ ហើយនៅក្នុងកំណត់ត្រានេះ កម្ពុជា ធ្លាប់ចាញ់ ឥណ្ឌូនេស៊ី រហូតដល់ ១០-០ ក្នុងការប្រកួតស៊ីហ្គេម កាលពីឆ្នាំ១៩៩៥។
ជាមួយគ្នានេះ ក្រុមគ្រូបង្វឹកកម្ពុជា ក្រោមការដឹកនាំផ្ទាល់របស់អ្នកចាត់ការក្រុម លោក Keisuke Honda បានសិក្សា និងវិភាគយ៉ាងស៊ីជម្រៅទៅលើទម្រង់លេងរបស់ក្រុមឥណ្ឌូនេស៊ី នាពេលបច្ចុប្បន្ន ហើយឃើញថា ក្រុមនេះ កាន់តែមានទម្រង់លេងល្អ ជាពិសេស គឺបាល់រៀបចំ (Set Piece) ដែលល្អជាង ក្រុមម៉ាឡេស៊ី ទៅទៀត ហើយចំណុចនេះ កម្ពុជា បានជំរុញឱ្យកូនក្រុមរបស់ខ្លួន ត្រូវបង្កើនការប្រុងប្រយ័ត្នឱ្យបានខ្ពស់បំផុត ដើម្បីទប់ទល់ជាមួយ ឥណ្ឌូនេស៊ី នៅយប់នេះ។
«ទាំងក្រុមការងារគ្រូបង្វឹក ក៏ដូចជាលោកគ្រូ Honda បានសិក្សាឃើញថា ឥណ្ឌូនេស៊ី មានភាពគុណភាពខ្លាំងទៅលើបាល់រៀបចំ ដែលបាល់ Set Piece នេះ ពេលលេងជាមួយ ម៉ាឡេស៊ី យើងបានធ្វើខ្លាំងមែនទែន ហើយយើងក៏អត់របូតគ្រាប់បាល់ ពាក់ព័ន្ធនឹងបាល់ទាត់ជ្រុង និងបាល់ទាត់ហ្រីឃីក នេះដែរ ប៉ុន្តែឥឡូវនេះ យើងត្រូវផ្តោតបន្ថែមទៀត ជាមួយឥណ្ឌូនេស៊ី»។ នេះជាការលើកឡើងរបស់គ្រូជំនួយក្រុមជម្រើសជាតិកម្ពុជា លោក ភា សុភ័ក្ត្រា។
លោក ភា សុភ័ក្ត្រា ដែលទើបទទួលបានតួនាទីថ្មី ជាគ្រូវិភាគរបស់ក្លិបវិសាខា ផងនោះ បានបន្ថែមថា៖ «ឥណ្ឌូនេស៊ី កាន់តែរៀបចំបានល្អ ទៅលើបាល់រៀបចំនេះ ជាពិសេសទៀតនោះ គេមានអ្នកបោះបាល់បានឆ្ងាយ អ៊ីចឹងយើងកាន់តែប្រយ័ត្នប្រយែងទៅលើចំណុចទាំងអស់នេះ ហើយកីឡាកររបស់យើង ក៏ត្រូវតែផ្លាស់ប្តូរទម្លាប់ឱ្យកាន់តែរហ័សជាងនេះ ពាក់ព័ន្ធនឹងបម្រែបម្រួល ពីពេលដែលយើងមានបាល់ និងពេលដែលយើងបាត់បាល់ ផងដែរ ព្រោះការបាត់គ្រាប់បាល់ ពេលលេងជាមួយម៉ាឡេស៊ី ដោយសារការបម្រែបម្រួល ពីប្រយុទ្ធ មកការពាររបស់យើង នៅមានចំណុចខ្វះខាត»។
ចំណែកលោក Shin Tae-young គ្រូបង្គោលក្រុមជម្រើសជាតិឥណ្ឌូនេស៊ី បានបង្ហាញពីឆន្ទៈដ៏មុតស្រួចរបស់កូនក្រុមលោក ដោយលោកបានអះអាងថា គោលដៅរបស់ក្រុមនេះ គឺឈ្នះ។ «នេះជាលើកទីមួយរបស់ខ្ញុំ ដែលបានចូលរួម ពាន AFF Suzuki Cup ហើយខ្ញុំរីករាយណាស់ ដែលមានឱកាសបានជួបមិត្តរួមការងារ នៅអាស៊ីអាគ្នេយ៍។
ចំណែកលោក Shin Tae-young បាននិយាយបន្ថែម នៅក្នុងសន្និសីទកាសែតរួមគ្នា កាលពីថ្ងៃសៅរ៍នោះទៀតថា៖«យើងសង្ឃឹមថា នេះជាបទពិសោធដ៏ល្អ នៅក្នុងអាជីពរបស់ខ្ញុំ ដោយយើងនឹងធ្វើបានល្អគ្រប់ការប្រកួត អ៊ីចឹងខ្ញុំជឿថា លទ្ធផលដ៏ល្អ នឹងអមដំណើរជាមួយក្រុមឥណ្ឌូនេស៊ី ព្រោះគោលដៅរបស់យើង គឺឈ្នះ»៕