បរទេស៖ លោក Ryu Hirose គ្រូបង្វឹកនៃក្រុមបាល់ទាត់ជម្រើសជាតិកម្ពុជា បានបញ្ជាក់ថា ទម្រង់លេងរបស់ក្រុមលោកបានធ្វើឲ្យពេញចិត្ត និងចាប់អារម្មណ៍ បើទោះបីក្រុមដែលមានរហស្សនាមថា គោព្រៃមួយនេះ បានរងបរាជ័យក្រោមស្នាដៃក្រុមបាល់ទាត់ជម្រើសជាតិឥណ្ឌូនេស៊ី ក្នុងលទ្ធផល ៤-២ ក្នុងការប្រកួតជុំទី២នៃពូល B នាព្រឹត្តិការណ៍ AFF Suzuki Cup ឆ្នាំ២០២០ កាលពីថ្ងៃព្រហស្បតិ៍ក៏ដោយ។
លោក Hirose បានប្រាប់អ្នកយកព័ត៌មានបន្ទាប់ពីការប្រកួតថា៖ «នៅថ្ងៃនេះ យើងបានចង់ផ្តល់ឱកាសដល់កីឡាករវ័យក្មេងឲ្យបង្ហាញខ្លួន ហើយខ្ញុំគិតថា ពួកគេបានចាប់ផ្តើមបែបអន្ទះសារបន្តិច ប៉ុន្តែ ក្រោយពីកីឡាករមានបទពិសោធមួយចំនួនបានចូលលេង យើងបានដោះស្រាយបញ្ហានោះ ហើយយើងបានលេងយ៉ាងល្អ»។ លោកបានបន្ថែមទៀតថា៖ «នេះគឺជាក្រុមមួយដែលយើងកំពុងតែរៀបចំសម្រាប់ថ្ងៃអនាគត ហេតុនេះ យើងចង់ឲ្យពួកគេរក្សាការអភិវឌ្ឍ ទាំងផ្នែកស្មារតី និងកាយសម្បទារ ហើយខ្ញុំគិតថា យើងបានបង្ហាញឲ្យឃើញនៅថ្ងៃនេះ»។
ក្រុមជម្រើសជាតិឥណ្ឌូនេស៊ី បានចាប់ផ្តើមយ៉ាងល្អ ខណៈដែលខ្សែការពារ Rachmat Irianto បានស៊ុតបាល់បញ្ចូលទី២គ្រាប់ ហើយ Evan Dimas បានបន្ថែមគ្រាប់បាល់១គ្រាប់ទៀតនៅតង់ទី២ ស្របពេលដែលក្រុមកម្ពុជា បានវាយបក១គ្រាប់វិញតាមរយៈកីឡាករយឺ សាហ្វី។ នៅក្នុងតង់ទី២ កីឡាករ Ramai Rumakiek របស់ឥណ្ឌូនេស៊ី និងប្រាក់ មុន្នីឧត្តម របស់កម្ពុជា រកបានគ្រាប់បាល់ដូចគ្នា ដើម្បីបំពេញលទ្ធផលនៃការប្រកួតតែម្តង ខណៈដែលលោក Shin Tae-yong គ្រូបង្វឹកក្រុមឥណ្ឌូនេស៊ី បានបញ្ជាក់ថា ក្រុមរបស់លោកមានចំណុចជាច្រើនដែលត្រូវតែកែតម្រូវ ទោះបីលោកពេញចិត្តនឹងលទ្ធផលក៏ដោយ៕
ប្រភពព័ត៌មាន៖ AFF Suzuki Cup