បរទេស៖ ខ្សែប្រយុទ្ធ Kylian Mbappe រកបានគ្រាប់បាល់ទី១០០ក្នុងក្របខ័ណ្ឌ Ligue 1 សម្រាប់ក្រុម Paris Saint-Germain ក្រោយពីបានស៊ុតបាល់បញ្ចូលទី២គ្រាប់ ក្នុងពេលយកឈ្នះលើអតីតក្រុមរបស់ខ្លួន Monaco ក្នុងលទ្ធផល ២-០ នាកីឡដ្ឋាន Parc des Princes កាលពីថ្ងៃអាទិត្យ។
Mbappe បានរកគ្រាប់បាល់បើកឆាក តាមរយៈការស៊ុតបាល់ប៉េណាល់ទីនៅដើមតង់ ហើយបន្ទាប់មក រកបានគ្រាប់បាល់ទី២របស់គេ នៅមុនពេលបញ្ចប់តង់ទី១ ក្រោយពីការបញ្ជូនបាល់យ៉ាងល្អរបស់ Lionel Messi ដើម្បីរកគ្រាប់បាល់ទី១០០របស់គេក្នុងក្របខ័ណ្ឌកំពូលរបស់បារាំង បើគិតចាប់តាំងពីផ្ទេរទៅកាន់ក្លិប PSG ក្នុងឆ្នាំ២០១៧។
ខ្សែប្រយុទ្ធអន្តរជាតិបារាំងរូបនេះ ដែលក៏បានស៊ុតបាល់បញ្ចូលទី១៦គ្រាប់ក្នុងការប្រកួតលីកឲ្យក្រុម Monaco ក្នុងពេលចាប់ផ្តើមអាជីពរបស់គេនោះ នឹងឈានដល់វ័យ២៣ឆ្នាំ នៅចុងខែនេះ។ ជ័យជម្នះនេះ បានឲ្យក្រុម PSG បន្ថែមពិន្ទុនាំមុខរបស់គេនៅលើកំពូលតារាងនៃក្របខ័ណ្ឌ Ligue 1 រហូតដល់ទៅ១៣ពិន្ទុ ពីលើក្រុម Marseille ដែលបានយកឈ្នះលើក្រុម Strasbourg ២-០ នៅថ្ងៃអាទិតដូចគ្នានោះ និងនៅសល់១ប្រកួតក្នុងដៃ៕
ប្រភពព័ត៌មាន៖ Channel News Asia