បរទេស៖ លោក Ryu Hirose គ្រូបង្វឹកនៃក្រុមបាល់ទាត់ជម្រើសជាតិកម្ពុជា បានបញ្ជាក់ថា ក្រុមដែលមានរហស្សនាមថា គោព្រៃរបស់លោក នឹងផ្តោតលើការវាយសម្រុក នៅពេលបះក្រុមជម្រើសជាតិឡាវ ក្នុងព្រឹត្តិការណ៍ AFF Suzuki Cup ឆ្នាំ២០២០ នាកីឡដ្ឋាន Bishan ប្រទេសសិង្ហបុរី នៅរសៀលនេះ ចាប់ពីម៉ោង ៤:៣០ តទៅ។
សម្រាប់ក្រុមកម្ពុជា ការដណ្តើមបានជ័យជម្នះក្នុងការប្រកួតជុំទី៣ នៃពូល B នឹងផ្តល់នូវការជឿជាក់មួយសម្រាប់ពួកគេក្នុងការដណ្តើមបានសមិទ្ធិផលមួយពីយុទ្ធនាការនេះ ស្របពេលដែលការវាយសម្រុកគឺជាផែនការប្រកួតរបស់លោក Ryu។ គ្រូបង្វឹកសញ្ជាតិជប៉ុនរូបនេះ បានឲ្យដឹងថា៖ «នេះគឺជាការប្រកួតមួយដែលយើងមានឱកាសដ៏ល្អក្នុងការឈ្នះជាលើកដំបូងរបស់យើង ហើយគឺជាគោលរបស់យើង។ សម្រាប់យើង វាមានតុល្យភាពរវាងតំបន់ប្រយុទ្ធ និងការពារ ប៉ុន្តែ យើងចង់ដាក់សម្ពាធលើទីតាំងប្រយុទ្ធ ដើម្បីគ្រប់គ្រងបាល់ឲ្យបានច្រើន»។ លោកបានបន្ថែមទៀតថា៖ «ការគ្រប់គ្រងបាល់មិនមែនតែនៅតំបន់ប្រយុទ្ធឡើយ ប៉ុន្តែ គ្រប់តំបន់ទាំងអស់នៅលើទីលានប្រកួត។ យើងចង់ចាប់ផ្តើមរៀបតាំងពីតំបន់ការពារ និងគ្រប់គ្រង់ការប្រកួតគ្រប់តំបន់ទាងអស់ នៅលើទីលាន ពេលប្រកួតជាមួយគូប្រជែងណាក៏ដោយ»។
ស្របពេលជាមួយគ្នានេះ ឡាវ ក៏សង្ឃឹមថា នឹងទទួលបានលទ្ធផលល្អផងដែរ ពេលប៉ះក្រុមជិតខាង កម្ពុជា ដែលក្រុមតែមួយដែលពួកគេមានប្រវត្តិផ្តួលក្នុង AFF Suzuki Cup។ លោកគ្រូបង្វឹក V. Selvaraj បានបញ្ជាក់ថា វានឹងក្លាយជាការជឿជាក់ដ៏ធំមួយសម្រាប់ក្រុមឡាវរបស់លោក ប្រសិនបើពួកគេផ្តួលក្រុមជម្រើសជាតិកម្ពុជា ម្តងទៀត ក្នុងការប្រកួតចុងក្រោយរបស់ខ្លួន ក្នុង AFF Suzuki Cup ឆ្នាំ២០២០។ លោកបានឲ្យដឹងថា៖ «ពួកគេមានបទពិសោធជាងយើង ប៉ុន្តែ យើងមានផែនការប្រកួតដែលយើងជឿជាក់ថា នឹងដំណើរការនៅថ្ងៃស្អែកនេះ (ថ្ងៃពុធ)»៕
ប្រភពព័ត៌មាន៖ AFF Suzuki Cup
